政府今日公布咗個叫做「科技人才入境計劃」嘅新Plan，話係實施快速處理安排，可以引入多啲海外同內地科研人才喎！林鄭講咗咁耐要發展創科，成日掛喺口邊之餘，《財政預算案》又真係撥出成500億喺創科產業。睇嚟除咗土地之外，發展創科都可以話係林鄭施政嘅第二大重點了！

楊局長話新計劃係「係3拖1+2」，可以促進培育本地科技人才喎！

「科技人才入境計劃」係乜東東

　　晏晝創科局局長楊偉雄都特登走出嚟，同大家介紹吓呢個新計劃係乜東東。佢同常秘卓永興都話，個計劃暫時係以先導形式推行，為期３年，大約半年至9個月之後就會做返個檢討，而第一個運作年度就試吓輸入最多1000人先，每人簽證期係2年喎！

　　局長仲話，有關申請要由公司提出，申請成功就可以得到每年最多100人嘅配額，不過間公司就要證明輸入嘅人才係香港缺乏，又或者係好難先搵到有相關技能、知識或經驗嘅人才，以保障本地人士嘅就業機會喎！

搶香港人飯碗？局長話有得「3拖1+2」

　　Jenny聽完政府講，就覺得新計劃咁似優才計劃2.0嘅？卓常秘就同Jenny講，兩個計劃係唔一樣，因為優才計劃啲申請者係想移民，而且門檻又高，同今次呢個新計劃係兩樣嘢嚟！即係科技版嘅輸入外勞？咁實有好多人驚被人「搶飯碗」㗎噃！

　　而局長就解釋，今次呢個計劃規定，申請嘅公司同機構每請3個非本地人士，就要請返1個本地全職僱員同埋兩個本地實習生，而呢啲本地僱員全部都要安排做返同科技相關嘅工作，「係3拖1+2」！相信可以促進培育本地科技人才咁話喎！不過今時今日，講到創科大陸都有大把世界，就好似今日騰訊阿頭馬化騰都啱啱「升呢」做中國首富，而香港就好似起步冇耐，唔知啲人才（尤其係資深）係唔係真係肯過嚟香港「開墾」呢？