根據非正式統計，天文台應該係畀人鬧得最多嘅政府部門。今日天文台要掛波，但點知時間錯咗！睇嚟正要受萬民唾罵，感受港人「團結」力量之際，又畀佢咋咋臨出個道歉啟事勉回唔少分數噃！Jenny覺得天文台可能真係畀人鬧得多，學識咗道歉嘅藝術喇！

今次唔荒唔係Signal Wrong喇!不如考慮吓真係搵Signal Wong拍段片啦!

天文台「早洩」一號波

　　話說啱啱就過咗個熱到破晒紀錄嘅5月，相信唔少朋友都同Jenny一樣，以為自己去咗泰國（最Sad係仲要返工）！事關呢個5月雨少風更少，又熱又焗，仲破咗最長酷熱警告生效時間，掛咗成300個鐘咁多呀！

　　可能係因為終於見到今年第一個襲港嘅颱風，連天文台都太緊張喇！竟然都出現咗「蝦碌」噃！是咁的，Jenny部手機喺今朝大約10點50分左右就收到天文台App嘅通知，話「Standby Signal No.1 was issued at 9:25 a.m.」即係話喺9點25分已經掛咗一號波；但係天文台個網頁就話「一號戒備信號在上午11時20分發出」。之不過嗰陣都未到11點，Jenny個腦入面又浮現「黑人問號？」張圖，唔通一號波都可以有兩個？

道歉夠快要一讚

　　結果隔咗10零分鐘，天文台就出咗個道歉啟事，話：「一號戒備信號的生效時間為上午11時20分。較早前因手民之誤，令信息提早發放。對於可能造成公眾不便，謹此致歉。」睇嚟天文台今次係早咗出Push兼寫錯時間喇！果然不負「香港最多人鬧的政府部門」之名！不過今次咁醒水，快快手就出咗個道歉啟事，話唔定咁就可以榮升做「香港最快道歉的政府部門」！都幾抵讚呀！今次值得畀啲掌聲！啪啪啪！（但下次做錯小妹一樣會唔留手咁鬧㗎）

　　Jenny心諗如果其他政府部門都肯對自己做錯嘅事，快快手認個錯再補救，就好喇！係咪先？