今日阿爺有個好消息帶畀大家！就係喺下個月開始，港澳台常住內地嘅居民，可以申請居住證，仲講明有3項權利、6項基本公共服務和9項便利咁正添！詳情就記得拉到底睇文末個表喇！點都好，Jenny都覺得係個便民措施。

（設計圖片）

首先你要……住半年或以上

　　樣樣嘢申請都要有個資格，唔係話你想要就有。呢個新措施嘅申請資格就係喺大陸逗留半年以上，並符合以下三個條件其中一個：「有合法穩定就業」、「有合法穩定住所」、「連續在內地就讀」嘅港澳台居民，拎張回鄉證去當地公安機關就可以申請，需時就大約係20個工作天。

　　雖然Jenny唔需要長駐內地，不過都知道以前淨係得張回鄉證，喺大陸其實有好多嘢都做唔到，又或者有啲措施係某啲地區先有，另外一啲又冇，真係人都癲！

53.5萬人應該很想要

　　相信最煩都係喺網上買車飛嘅時候，往往去到啲自動取票機時又要有大陸身分證先可以拎到，今次有咗居住證，就可以免卻呢啲麻煩喇！特首林鄭都話呢個措施「好有突破性」，因為係一個全覆蓋、唔駛再逐項逐項或者係邊個區域先有，好肯定會受到好多港人歡迎喎！

　　係唔係好受港人歡迎就未知，不過林鄭就話，單係常住廣東省嘅港人都有接近52萬，而喺內地各城市讀書嘅大學生，估計都有1.5萬，甚至更多，咁至少呢53.5萬人都會「很想要」！大家記得要識做，講返句「感謝國家、感謝黨」呀！

有關權利、基本公共服務和便利清單:

3項權利

1. 勞動就業

2. 參加社會保險

3. 繳存、提取和使用住房公積金

6項基本公共服務

1. 義務教育

2. 基本公共就業服務

3. 基本公共衞生服務

4. 公共文化體育服務

5. 法律援助和其他法律服務

6. 國家及居住地規定的其他基本公共服務

9項便利

1. 乘坐國內航班、火車等交通運輸工具

2. 住宿旅館

3. 辦理銀行、保險、證券和期貨等金融業務

4. 與內地居民同等待遇購物、購買公園及各類文體場館門票、進行文化娛樂商旅等消費活動

5. 在居住地辦理機動車登記

6. 在居住地申領機動車駕駛證

7. 在居住地報名參加職業資格考試、申請授予職業資格

8. 在居住地辦理生育服務登記

9. 國家及居住地規定的其他便利