港人日日叫「買樓、買樓、買樓」，今次遇上銀行開始「加息、加息、加息」，Jenny朋友就話終於等到樓價有機會跌，但另一位朋友仔就話「諗多咗喇！」，梗係啦佢近排先做咗「二按」套現，諗住再買多間……咁啱今日Jenny就去左香港持牌放債人公會個午宴，見到「私貸之父」長原彰弘san，一於問下佢點睇樓價啦！點知連佢都話港樓升得癲，仲估遲下樓價會調整！

左三就係「私貸之父」長原彰弘san喇!

長原san港日都有樓揸手

　　大家見到長原san個名，以為佢係日本人？非也！其實長原san是台灣人，原名張炳煌，台大法學院畢業後，去咗日本東京一橋大學取得博士學位，畢業之後加入當地信用財務公司，亦改埋名入籍日本，之後仲創立埋亞洲聯合財務（UA），「卡數一筆清」咪就係佢囉！

　　長原san經常穿梭中、港、日、台四地，喺日本、香港都有置業，講起近年香港人鍾意去日本買樓收租，佢就話，日本樓升得慢，收租好喇，唔好預有得炒；而香港樓就升得非常癲，後生仔冇「父幹」真係唔使諗買樓！

賽西湖當年只賣28萬？！

　　佢話1968年左右佢太太喺日本東京買咗層樓值400萬日圓，前幾年日本政府話要收地起路，佢地去估一估價間屋值幾錢啦！點知過咗成30幾40年，間屋值到3500萬日圓左右，升左8倍幾咋！咁香港呢？長原san就話佢1977、8年左右，睇中個賽西湖千幾呎單位，開售嗰陣28萬港元，當然佢最後就唔係一手買入啦，而家個單位值成2800幾萬港元，以開售價計，升咗足足成百倍！真係不得了！

　　「人人都以為樓價唔跌！我話邊有可能唔跌！」長原san講就咁講，但今次加息會唔會令樓價調整呢？佢就同Jenny講今次加得少，仲有好多內地人等住買港樓，短期應該就唔會有太大影響喇！但第時就唔知嚕！連佢都話而家加埋辣招，都唔再諗買樓住喇！