【晴報專訊】鄭伊健、錢嘉樂、謝天華及林曉峰（阿Lo）昨日到商台宣傳新片《黃金兄弟》，陳小春因工作缺席。今次「古惑仔」原班人馬再合作，個個親身上陣高難度動作，結果拍到五癆七傷，伊健更左肩韌帶撕裂，手尾相當長。

謝天華、鄭伊健及林曉峰為滿足錢嘉樂的導演夢，受傷在所不計。

　　錢嘉樂今次自導自演新片，除了感激好兄弟伊健、小春等毫不錫身演出，更特別感謝監製曾志偉。嘉樂說：「今次去咗匈牙利、內蒙古、日本等拍外景，製作費高達兩億，超支幾千萬！不過志偉好支持，喺匈牙利仲租咗一條橋拍攝，日租100萬，最感動係佢話完全配合我需要。」

　　伊健在拍攝期間拉傷左肩韌帶，至今仍未痊癒：「雖然撞到韌帶，但係好開心幫嘉樂完成夢想。」而陳小春及阿Lo拍攝一場打鬥戲時，更分別整傷腰及頸，阿Lo說：「試戲時已經拉傷頸，正式拍再拉傷唔同部位，我以為自己已經好傷，但小春嗌得仲慘。」

　　結果小春因腰傷停工一天，嘉樂在各地遍尋名醫為大家推拿針灸，又取笑小春受傷一刻，叫聲似足孕婦分娩。阿Lo又說：「後尾睇番片，呢場戲竟然剪咗，我未出聲小春已經話『搞錯！』，咁辛苦拍完剪咗。」

謝天華chok過劉華

　　至於戲中唯一沒受傷的謝天華，原來是眾人中最舒服，不但動作戲少，嘉樂更笑指天華在戲中每個甫士都chok過劉德華。天華說：「我為咗拍一個唔太見到樣嘅鏡頭，坐咗48個鐘飛機去匈牙利！」