【晴報專訊】ViuTV真人騷《全民造星》總決賽將於本月14日舉行，大熱門之一的肥仔（梁業）一直以好舞功及搞笑才華吸引觀眾，他坦言很想贏冠軍：「其實只差一步，點解唔嘗試再努力啲，去爭埋嗰一步（冠軍）呢？」

肥仔性格友善又愛照顧人，是節目中的「友誼先生」。

　　外表胖嘟嘟、似足「少年曾志偉」的肥仔，明顯就不是sell高大靚仔的正統偶像類型，但能夠在比賽初段的99位參賽者中，以「票王」姿態直入55強，證明肥仔的實力與觀眾緣絕對非一般。本身是舞蹈教師的他，挺着巨腩在台上頭頂地板倒立，身手靈活得似洪金寶，令人看得嘩嘩聲，連頂頭大熱姜濤也看好他奪冠。

完成盧凱彤期望

舞技出眾的肥仔「倒豎蔥」曬腩，獲觀眾激讚。

　　「潛力股」肥仔獲眾人睇好，向來表現淡定的他也大嘆緊張：「我相信十強個個都咁緊張，我覺得決賽嘅表演做得好，人哋就會覺得你值得贏。」提到決賽表演，他大賣關子笑說：「表演擅長嘅項目當然增加勝算，但我會做一啲大家唔expect我會做嘅嘢！」

　　不論在台上台下，有肥仔的地方總有笑聲：「我嘅宗旨就係帶正能量畀大家。」他明白觀眾選擇娛樂，自然想揀開心的東西來抒發壓力。「娛樂圈就係娛樂人，我表演嘅同時，都好開心同抒發緊自己情緒。」

肥仔巧遇志偉，猶如餅印的他搞笑叫對方「阿爸」。

　　外形未及其他參賽者出眾，肥仔笑言自己吸納較多男粉絲：「我以underdog（劣勢）身份參加比賽，唔少香港人都有英雄主義㗎嘛，希望有人路見不平、拔刀相助咁去幫下我。」節目中，肥仔獲已故歌手盧凱彤（Ellen）鼓勵入行，他自言目標不止限於勝出比賽：「我要繼續喺呢行發展落去，我覺得咁先係完成到佢（Ellen）嘅夢。」或許肥仔不是完美偶像，但他的實力和樂觀想法，相信在娛樂圈發展，定能成為大家的開心果。