【晴報專訊】鄭中基（Ronald）與杜汶澤昨日到北角出席健身中心開幕，將於明年初於紅館開個唱的鄭中基，最近已開始密鑼緊鼓健身操弗，目前已減掉30磅，希望開騷時輕鬆落台跟歌迷握手。

鄭中基笑言今次個唱不敢答應送飛，免得一身飛債。

　　繼去年開完紅館騷後，鄭中基明年農曆年間將再開個唱，為了保持最佳狀態開騷，Ronald最近努力操弗練氣：「我唔係要大隻，而係想練氣同身體線條，上次開騷落台握手，返上台已經喘氣。呢排努力操，都減咗30磅，依家145磅，可以再操弗少少。」

　　問到屆時會否安排充滿表演慾的囡囡Emma上台唱歌？Ronald預告今次會三代同堂，孖爸爸鄭東漢及囡囡一齊上台表演：「唱一隻歌就算啦！」同場的杜汶澤去年曾為Ronald的個唱任嘉賓，阿澤笑言今次會用正常途徑向Ronald攞飛：「我已經send email問佢拎飛，不過佢未覆我！」

杜汶澤增磅參加健美先生

杜汶澤（右）笑言要練大隻，加入健身界。

　　練得一身肌肉的阿澤，表示目前重170磅，希望增磅至200磅，參加健美先生比賽：「我見陳奐仁咁fit好羨慕，我依家目標係50歲之前參加健美比賽，仲有四年時間備戰，依家已經戒酒、食烚雞肉同菜。」他笑言娛樂圈人人嗌減肥，他偏偏去增磅：「到時倒罐綠油淋全身就可以去拍《變形俠醫》！」