19/12/2018
蛋糕同果撻二揀一 視后李佳芯冧男友心思
【晴報專訊】出爐視后李佳芯(Ali)前晚出席新劇《殺手》煞科宴,她自爆獲男友陳炳銓送上一件蛋糕及一件果撻慶祝,禮物看似簡單,但原來別具意義,令她不禁冧爆大讚男友有心思。
出爐視后李佳芯(Ali)前晚出席新劇《殺手》煞科宴。
李佳芯前晚與陳豪、黎耀祥、龔嘉欣及高海寧(高Ling)等出席煞科宴,Ali獲高Ling送上鮮花及獻吻,祝賀她獲得視后。問到男友陳炳銓有何表示?Ali透露對方使出冧招慶祝︰「佢一早買定一件蛋糕同一件果撻,等我夜晚返去食。佢話如果我得獎,就係a piece of cake(小事一件),就食咗件蛋糕;如果唔好彩『撻Q』就食件撻啦!結果我兩樣都食咗,唔知算唔算浪漫。」身旁的陳豪聞言即忍不住大笑,又讚陳炳銓的冧招充滿歡樂︰「呢啲似拍戲先會有嘅橋段,我要學習下!」
陳豪在《殺手》應付大量動作戲,相當辛苦。
Ali表示現時先休息,明年四月才會開拍新劇,期間會拍攝綜藝節目,有時間好好調理身體︰「唔單止我個腎,五臟六腑都要調理下,有得瞓多啲,應該好好多!」而陳豪表示《殺手》尚有兩日戲份,完成後會與家人飛往澳洲,度過熱辣辣的聖誕。另外,同場的龔嘉欣拍攝《殺手》時,親身上陣多場動作戲,結果周身傷,包括手指斷筋、右腳縫三針等。難得她仍開玩笑說︰「好彩無傷到塊面,右邊小腿啱啱拆綫,仲要食止痛藥,醫生話好大機會留疤。我每次受傷都有影相,真係可以出本受傷特集!」她自言不想令家人擔心,所以過去四個月沒有回家,免得家人看到她的傷勢。
龔嘉欣見傷痕痛哭
龔嘉欣大讚黎耀祥忍得痛,被她撞到肋骨仍面不改容。
嘉欣坦言每次洗澡見到自己滿身傷痕都不開心,更試過痛哭︰「第一場戲要同祥哥(黎耀祥)對打,要用鉸剪腳夾佢,又要吊威也,返到屋企對腳瘀晒,頭又撞落石屎地,忍唔住喊出嚟。」不過她笑言沒有接錯劇,因為可跟黎耀祥學習,自己獲益良多。
轉載自: 晴報
etnet榮獲HKEX Awards 2023 「最佳表現證券數據供應商」大獎► 了解詳情