【晴報專訊】許廷鏗（Alfred）將於3月23日首踏紅館開騷，其個唱海報前晚曝光。Alfred的口唇塗滿紅色唇膏，擺出一副似被人強吻後的苦情樣。至於個唱名為「再見智慧齒」，也令人誤會這位兼職牙醫將會在台上表演剝牙，很多樂迷笑爆Alfred玩得盡；有人亦嘲諷他似是食完熱狗唔抹嘴！

　　Alfred參加無綫音樂真人騷《超級巨聲》出道，入行十年曾唱出多首金曲如《青春頌》、《螞蟻》等橫掃樂壇頒獎禮。前年他由星夢娛樂轉會華納唱片，人氣未減，更宣布今年三月舉行首個紅館演唱會，認真可喜可賀。

期待萬人見證「初夜」

Alfred在樂壇打滾多年，與陳柏宇、周柏豪等歌手老友鬼鬼。

　　他在上周落幕的叱咤頒獎禮中，首度拿下「叱咤樂壇男歌手」銀獎，其音樂路無疑是一片光明。難得迎來人生的第一個紅館個唱，Alfred透露演唱會的歌單早已完成，而個唱優先訂票亦於昨日展開。今次Alfred的處男紅館騷名為《許廷鏗再見智慧齒演唱會2019》，他在前日推出的個唱海報中，口唇塗滿紅色唇膏，加上一副天然呆樣，甚為有趣。

許廷鏗的個唱海報造型另類，連知名KOL高登天后King Jer也取笑他「處男見紅」。（FB圖片）

　　日前Alfred現身商台受訪，他戲言開騷當日不打算穿內褲︰「我想畀大家多啲幻想空間，將坦蕩蕩的心態擺上舞台！」Alfred又感激林海峰為他設計個唱海報︰「海報和『初夜』有點相似，總之大家都會覺得性感嘅，平時我影啲相都好正經，今次就玩得開心啲！佢成全我呢個『初夜』，到時紅館有萬二人見證我嘅『初夜』！」

兼職牙醫的Alfred早前找來一位甩掉門牙的小朋友宣傳個唱。

　　其實，過往林海峰曾為李克勤、容祖兒及楊千嬅等一線歌手設計紅館個唱海報，豈料今次玩「血腥」卻惹網民熱議，有人戲言海報中的Alfred如同被人強吻後「成口血」；有粉絲更指其個唱名字「再見智慧齒」夠玩味，下次可以開「再見門牙」、「再見大牙」演唱會。