【晴報專訊】Angelababy（楊穎）昨日30歲生日，丈夫黃曉明特地在凌晨零時隔空於微博Po相，他與兩歲囝囝「小海綿」合作畫「公主版」Baby，送給身在外地的壽星女。粉絲感慨偶像轉眼30歲，踏入輕熟女之齡；有網民就祝福他們一家三口永遠幸福。

　　近年已成為內地一綫女星的Baby，近日獲邀到法國出席巴黎時裝周，更在當地提早過生日切蛋糕，迎接三十而立之齡。昨日凌晨零時，Baby丈夫黃曉明在微博施展冧功，上載與囝囝炮製給太太的生日禮物，原來兩父子夾手夾腳畫了一幅靚靚公主版Baby畫作，當中「小海綿」低頭玩畫筆，其濃密的頭髮似足爸爸。曉明留言︰「生快！美媽！」一切盡在不言中。

掛念愛兒日日FaceTime

　　此外，Baby獲多位《奔跑吧》系列的拍檔包括王祖藍、陳赫等在微博送上生日祝福。至於網友們，讚賞出道16年的Baby仍是粉絲心目中的美少女；有人亦恭喜女神擁有美滿家庭。

黃家父子檔製作公主版Baby插畫，一筆一劃都充滿愛。

插畫

　　另一方面，Baby日前在巴黎接受無綫娛樂新聞台訪問，她直言希望今年有多些休息時間︰「前幾年做咗好多嘢，依家BB又識講嘢，日日都同佢FaceTime。（母子檔上節目？）唔會，我真係好唔想成日偷拍小朋友，希望大家理解，我覺得小朋友有自由嘅空間長大會好啲。」

Baby日前在巴黎回應被掌摑傳聞，她直斥只是作故仔。

　　此外，日前爆出Baby去年錄影《奔跑吧》期間，被內地女星鍾楚曦掌摑。對此，Baby堅決否認︰「其實真係無呢啲事，我同佢（鍾楚曦）係正常傾偈嘅朋友。點解啲人作到咁？現今網絡環境唔係好好，求其噏啲故事就好多人信，希望大家可以理智啲。」