【晴報專訊】張敬軒（軒仔）前晚在社交網Po片，繼16年起化身「降兩度」後，今次再變「偽娘」火龍果，惡搞容祖兒的八月紅館個唱主題曲《Pretty Crazy》，改為《Pretty Hungry》。軒仔改詞兼模仿好友的動作和神態，輕鬆吸Like。不少粉絲大讚軒仔扮女人正過祖兒，更指他玩得夠癲！

　　近年經常玩惡搞的軒仔，日前在社交網Po相預告將會男扮女裝Cosplay祖兒，玩轉對方的新歌《Pretty Crazy》MV。前晚，軒仔的二次創作短片終於曝光，他更自稱是未出道即引退的歌手「火龍果」，並以多種水果及食具配襯舞衣，製作自家MV《Pretty Hungry》，揚言向祖兒致敬，實情是幫對方在八月的紅館演唱會造勢。

軒仔將半邊火龍果掛在胸前，騎呢得嚟夠吸睛。

　　軒仔在這個搞鬼MV中，戴上假髮，以四個惹火造型登場，並與六位男舞蹈員大唱大跳，其繽紛打扮、浮誇表情及濃濃女人味，成功俘虜網友的心，軒仔更刻意在鏡頭前騷腳毛，勁重口味。MV在FB上載不足24小時，已錄得近32萬點擊，認真厲害。

阿Sa讚扮相有啲靚

《Pretty Hungry》配合激似原版祖兒MV的布景，絕對是誠意之作。

　　軒仔在MV尾段除了呼籲觀眾關注其個人YouTube頻道，亦順道提醒大家，祖兒個唱門票於明日正式公售。慘遭惡搞的祖兒亦交足戲，昨午在軒仔的IG回應，戲言對方的打扮如同妖孽︰「我軒仔以前好乖巧㗎，唔知點解而家搞成咁，唔好講咁多啦，一於攞筷子嚟夾佢啲手指，燒啲符水佢飲吧啦。」

　　此外，軒仔的圈中好友亦紛紛留言，阿Sa更刻意抽水︰「醜到喊咩？點解我覺得有啲靚？」鄭希怡則稱睇完有點肚餓。至於網友對軒仔的偽娘打扮就狂派Like，大讚他靚過真女人；有粉絲更呼籲他以火龍果造型在祖兒的個唱上踩場。