【晴報專訊】林夏薇（薇薇）與陳家樂去年因合作劇集《逆緣》成為好友，默契十足的他們前晚拍住上，錄影汪明荃主持的無綫遊戲節目《娛樂大家》。不過薇薇乘機取笑陳家樂「懶醒」，實質是豬隊友，二人互窒相當搞笑。

林夏薇前晚以短裙look上陣，大曬纖瘦美腿。

　　林夏薇與陳家樂繼《逆緣》後「再續前緣」玩遊戲，家樂笑言因彼此「太夾」︰「我哋之前一齊去玩Do姐（鄭裕玲）嘅遊戲節目，贏咗成萬蚊，所以即刻被監製垂青，挑戰汪阿姐（汪明荃）嘅節目。」

陳家樂自嘲唱功麻麻，所以無緣唱劇集主題曲。

　　家樂自認玩遊戲最醒，同時又讚薇薇直覺夠準，即被薇薇取笑說︰「頭先試玩，發覺家樂係豬隊友，我明明救咗佢兩次，佢反而指住話我係兇手。」家樂笑言其實是陰謀，令其他參賽者以為他們不咬弦︰「咁敵人鬆懈，我哋就可以贏錢。」他們更互相提點對方「醒少少」。家樂又自言性格不服輸，有利於玩遊戲，薇薇聞言笑說︰「佢係玩家！我係指遊戲王嗰隻！」是否拍戲時發現家樂是玩家？薇薇扮傻說︰「我唔知呀，我一陣同家樂同隊，要小心啲講嘢。」家樂聞言無奈說︰「薇薇成日都蝦我。」

唱歌試音無下文

　　另外，薇薇早前被指想加入樂壇，她澄清只是純粹喜歡唱歌，家樂即揶揄說︰「薇薇唱歌無可能啦，我哋曾經諗住合唱劇集主題曲，不過監製聽咗我哋嘅歌聲後無下文，就知道咩事啦！」薇薇坦言，演戲與唱歌兩者之間，自己還是比較喜歡演戲︰「不過有機會都會試下唱歌，之前上過《流行經典50年》，或者去下登台，已經好開心。」