【晴報專訊】一向識飲識食的黃秋生，早前夥拍相識廿載的名廚好友張錦祥（Ricky），齊齊遠赴意大利展開兩星期美食之旅，品嘗不少正宗意大利菜。兩人坦言拍攝行程緊密，加上經常在山區留宿拍外景，秋生試過三日沖一次涼，更自爆曾被當地人誤認作拿玻里「黑幫」，果然夠殺氣！

　　黃秋生與Ricky去年11月為ViuTV拍攝新節目《究竟食咗乜》，節目本周播出，兩位相識多年的好友互寸互窒，輕鬆擦出火花。名廚Ricky要與當地廚師大鬥法，並由秋生擔任評判。Ricky透露，特別從香港攜材料到當地炮製港式雲吞麵，讓秋生在彼邦也食到家鄉的味道。至於秋生亦指在當地見識很多傳統食品的工場，嘗盡意國各式美食，此行絕對「學到嘢」。Ricky亦讚老友對食用心，絕對是一名美食家。

食家變黑幫

Ricky（左）與秋生穿上專業保護衣，合力製作地道螺絲粉。

　　兩人此行主要到訪意大利小鎮，足足走遍十幾個不同地區，甚至無得沖涼，令秋生大叫辛苦。「因為要日日換地方，煮嘢拍攝晚晚搞到10點，住宿的地方又是山區或小鎮，入到房已經11點，翌日又要朝早六、七點起床出發，搞到我三日才沖一次涼！」秋生戲言抵達大城市如米蘭，才發覺自己身上「一朕味」。

鬼馬的秋生（左）整薄餅，卻搓出叉燒包形狀，還笑指這是「human meat bread」，令人想起其經典作《八仙飯店之人肉叉燒包》。

　　貴為影帝的秋生分享拍攝趣事，他曾在意大利小鎮被誤認是黑幫，令他哭笑不得。「我們在山崖上的葡萄園拍攝中，那兒位處山旯旮，有個工人在我們臨走時話見過我，話我曾在拿玻里問他要唔要槍！」秋生透露拿玻里有不少黑幫，思前想後才驚覺對方暗寸他似江湖人物。身旁的Ricky也忍不住抽水︰「秋生真係夠殺氣！」

飲清酒抗疫

黃秋生（左）與Ricky相識廿年難得合作，當然趁機會把酒談歡。

　　另一方面，對於近日新型肺炎肆虐，秋生自言近日已甚少外出，又自爆農曆新年期間狂擦蘿蔔糕。「我食了廿日，食到嘔，但我煎蘿蔔糕叻咗！」Ricky更搞笑指現時用高濃度酒精療法「抗疫」。秋生即補充說︰「一個人整熱兩支清酒，飲足三日，夜晚天寒地凍自我隔離！」提到現時全港市民瘋搶口罩，秋生卻不以為然︰「我用緊呢個口罩可以重用，加上外出購物後即回家，之前在家中找到廿多個沙士後還未用過的口罩呢！」

餐餐意菜食到怕

如果節目開Part 2，秋生直言渴望到日本歎美食。

　　秋生雖然最耍家煮意粉，但拍攝期間已經食到怕。「初時到拿玻里有得食正宗Pizza好興奮，但全程十幾日每日餐餐都食意粉、薄餅，頂到最後四日頂唔順。我哋在超市見到有雞、牛、羊肉，即時買返去自己煮！」Ricky更帶同港式調味料豉油、蠔油等，炮製出創新「豉油西餐」。