【晴報專訊】黃翠如近日忙於為新劇《七公主》開工，劇中經常要穿緊身西褲的她，透露獲好姊妹唐詩詠送贈健康食品助清宿便，期間翠如更公開搲撈，笑言希望有廣告商找她和詩詠擔任清宿便代言人，認真搞笑。

黃翠如在新劇中經常要穿緊身褲亮相。

　　翠如昨日在將軍澳無綫電視城拍攝新劇《七公主》，她透露該劇已拍了數天，稍後有一幕與杜燕歌鬧交的戲份，翠如表示︰「我同杜燕歌之前喺《師父明白了》合作過。套劇其他演員話開頭都係拍一啲情緒嘅戲，等大家可以透過鬧交呢個方法去培養感情。」翠如將會連續七日拍攝律師樓戲份，要背誦大量資料對白，她透露每日通宵拍攝完畢，回家便會背劇本，她笑言︰「朝早背劇本會容易啲入腦，之後拍法庭戲應該仲『甘』，所以要勤力啲『溫書』。」

讚老公蕭正楠有幽默感

黃翠如和唐詩詠是圈中的好姊妹。

　　問到可有煲湯水護聲？翠如表示︰「頭先喺化妝間見到唐詩詠，佢煲咗紅棗水，問佢攞嚟飲佢又唔肯，仲要玩我啲化妝品，嘥我時間。不過，呢個女人好sweet嘅，我喺劇入面成日着緊身西褲，而佢拍嗰套劇就要露腰，我哋一定要清走啲宿便，所以佢畀咗啲話好貴嘅綠色健康食品畀我食，話食完之後要飲多啲水，就可以幫助清理宿便，希望遲啲有人搵我哋做清宿便代言人啦。」

黃翠如讚老公蕭正楠有幽默感。

　　而蔣家旻最近與翠如老公蕭正楠拍攝劇集《一笑渡凡間》時，表示羡慕翠如有個充滿幽默感的老公，對此翠如笑言︰「唔好畀佢（蕭正楠）知，唔係佢會驕傲。」翠如直言老公對住自己也很幽默，她表示︰「可能佢屋企多女人，佢媽咪、阿姨呀，佢個女性家庭好需要佢，因為佢係屋企嘅開心果，而佢亦遺傳咗父親的幽默感。」