• |
  • 極速報價
  • |
  • 會員
  • 產品服務 / 串流版
  • 設定

01/06/2020

爆內地女星派房號誘上房 馬明唔落疊︰我驚畀人捉「黃腳雞」

  • 加入最愛專欄
  • 收藏文章

  【晴報專訊】馬國明日前與有份演出熱播劇《飛虎之雷霆極戰》的吳啟華、陳山聰及王敏德,接受由伍詠薇(伍姑娘)和林盛斌(阿Bob)主持的清談節目《Tiger`s Talk》訪問,馬明自爆在內地拍劇期間,有女星主動提供酒店房號碼誘他上房;而吳啟華亦大爆有內地一線女星向全體劇組人員派房號,引來不少網民剝花生。

 

 

  這集節目的主題是「男人不壞女人不愛」,阿Bob指男人要賤賤格格才吸引到女人,吳啟華即發表個人見解︰「我覺得冤豬頭都有盟鼻菩薩,咩人都有人鍾意。」馬明雖然貫徹天然呆,但就自認是壞男人,他說︰「我梗係壞啦。我壞嗰啲梗係唔講你聽啦!(有無傷別人心?)傷晒。」

 

馬明孝順又專一,難怪連內地女星都對他嗒晒糖。(電視截圖)

 

  至於風度翩翩的王敏德,被問到是否good guy?他笑稱︰「乖定係曳,我覺得都係差唔多。我拍拖時,個頭都係周圍望("目及"女仔),又會攞住杯紅酒四圍say hello,鬼佬係咁㗎啦!」

 

一線女星「好得」

 

四位型男(左起)陳山聰、王敏德、馬國明和吳啟華大談自己是否壞男人。(電視截圖)

 

  阿Bob又深入提問,指乖女人未必滿足到男人,吳啟華再發表偉論︰「咁兩個人可以互相影響嘛,要講靈慾合一,除咗慾之外,仲要有靈。」被阿Bob取笑他︰「程至美醫生上身。」而一向是乖乖仔的馬明,坦言很難憑空想像壞女人是否難以吸引到他,又指會被過分主動的女人嚇窒。他自爆︰「我哋拍劇都有遇過,試過返內地拍劇,遇到不太熟的女演員,佢會畀個房號碼你。我梗係唔會去啦,一陣間入到去畀成班麻甩佬捉你『黃腳雞』,我覺得係『裝』我唔係愛我,有啲想報警㖭呀。」阿Bob追問該女星是否做幕前?馬明就話係,但不願透露是誰。

 

吳啟華(右)爆內地有一線女星每晚向劇組人員派房號。(電視截圖)

 

  而近年長駐內地拍劇的吳啟華亦加入爆料︰「直情聽過係成組人都派,周圍同人講佢房號,連攝影師都有呀,呢啲壞女人可以壞到咁,仲要晚晚都派。(有無派畀你?)大家都知嘛!」他還直指該女星「好得」,伍姑娘追問是否女一?啟華笑稱︰「係萬人迷呀!」令全場譁然。他續說該女星在內地劇組已出晒名,又指若對方給房號自己,一定不會理會,但被問到如果全組人只給他一個?啟華即笑笑口謂︰「咁呢,就可能會考慮喇!」不少網民紛紛猜測馬明和吳啟華口中的女星是誰,引來激烈討論。

 

 

轉載自: 晴報

etnet財經 ‧ 生活App獨家「銀行匯率比較」功能 立即下載 iOS/Android

我要回應

  • 生活副刊
  • DIVA
  • 健康好人生