09/10/2020
疫市熱賣自家瑜伽衫 林芊妤將老爺房變貨倉
【晴報專訊】林芊妤(Coffee)昨日為代言的維他命補充劑拍廣告,上月推出個人瑜伽服品牌的她,甫開賣即被搶購一空。由於沒料到反應熱烈,Coffee惟有將老爺奶奶的房間改裝成「貨倉」,一邊執貨一邊湊仔,一舉兩得。
Coffee在疫情下仍拍廣告搵真銀,認真幸運。
林芊妤昨日大呻最近忙得沒時間做運動,連食飯都要傭人姐姐提點。Coffee說︰「呢排除咗搞自己生意,又要湊仔同湊老公,身體都差咗。其實我又曳,前一晚陪老公煲劇煲到凌晨三點,第二朝又要七點起身,唔知哪來嘅勇氣可以咁夜先瞓。」在疫情下接拍廣告,Coffee開心表示酬勞不用減價:「我啲客不嬲對我好好,從來都無打折呢樣嘢。」
身體唔好難追B
Coffee與員工在家中客廳執貨,兒子翟德彥在旁邊自得其樂。
成功轉型做KOL的Coffee,直言收入未受疫情影響,只是生活模式大大改變︰「因為疫情無得出去做運動,又要戴口罩,之前一路有教瑜伽,唔係為賺錢,純粹自己可以做運動,又可以同學生見面。不過我有小朋友,所以由去年12月開始已經停晒所有堂。」
Coffee早前一家三口影型爆全家福,但Coffee老公被取笑似「拎袋走佬」。
Coffee推出瑜伽服裝品牌大受歡迎,她笑言將屋企當做貨倉存放貨品。她說:「屋企有間房留畀老爺奶奶上嚟瞓,但疫情下佢哋嚟唔到,於是拎起張床褥,將啲貨擺上去;我嘅員工上嚟包貨,就喺客廳一齊搞。」她發現用屋企做貨倉有好處:「就係方便我湊仔,一邊工作一邊照顧佢,執執下貨可以去梳化同佢講故事。」太忙沒時間追第二胎?她直言:「真係生唔到,前幾日蘇民峰去我屋企拍電視節目,佢話我屋企風水好,但唯獨令我身體唔好,好難有BB,惟有照顧好身體,同搵啲嘢擋一擋。」
轉載自: 晴報
全新節目《說說心理話》青少年不可以戀愛!?真實個案講述驚心動魄經歷► 即睇