【晴報專訊】羅家英與汪明荃（阿姐）向來恩愛，農曆年將至，阿姐每年都自製蘿蔔糕送給親朋好友，家英哥昨日透露阿姐因疫情多數留在家中，所以已開始準備蒸糕，雖然他負責監督阿姐出品，但自爆唔敢多嘴挑剔，免得被阿姐責怪。

疫情所限，家英哥今年新春無法與阿姐去旅行。

　　羅家英與尹光夫婦、高志森及阮兆輝等，昨日出席謝曉瑩的《鳳求凰》新書發布會。下月農曆新年，家英哥透露阿姐已購入100斤蘿蔔，預計可以蒸40多底蘿蔔糕，送給摯愛親朋做賀年禮物。問家英哥可會幫手整糕？他搞笑說：「梗係會，我會喺隔籬睇住阿姐，當年我阿媽都係咁樣教個菲傭整榚。（當阿姐係工人？）我當阿姐係助理，講多句都係死罪呀！」

阿姐汪明荃去年親手炮製美味蘿蔔糕。

　　往年每到大年初一，阿姐都會招呼一班藝員到家中團拜，但今年礙於疫情關係，家英哥表示可能會減少聚會。問到可會分幾日團拜招呼朋友？家英哥笑稱︰「咁咪做死我！」

粵劇演出恐再推遲

《鳳求凰》作者謝曉瑩（中）向家英哥送上新書。

　　另外，家英哥與阿姐的「福陞粵劇團」原定農曆大年初九於西九劇曲中心演出九場，但目前疫情仍未緩和，家英哥說：「其實我哋已經第二次押後，依家等政府公布新一輪措施，如果真係演出唔到，預計會押後到今年12月。」他坦言相當頭痛：「因為有東華三院及保良局嘅慈善籌款包場，有啲飛已經賣咗，如果落實如期演出，就會落力宣傳，但當然一切都以健康同安全為先。」家英哥又透露，三月會去橫店開工，拍攝由佛山劇團製作的粵劇電影《白蛇傳》。