【晴報專訊】恭喜、恭喜！無綫《東張西望》前主持林泳淘昨日在社交網宣布已嫁初戀男友林卓立，結束長達14年的愛情長跑。由女神升呢人妻的泳淘，上周六（29日）在寓所低調簽紙結婚，她昨日在社交網上載多張婚禮照片，又向老公發表愛的宣言︰「相愛到海枯石爛，直到生命終結。」甜蜜滿瀉。

　　現年31歲的林泳淘，曾是組合Lacee Lacey成員，12年參加香港小姐落選後，成為無綫合約藝人，曾任《東張西望》及J2《3日2夜》主持，憑甜美樣子及豐滿身材成為宅男女神。上月已透露將和男友結婚的泳淘，昨日終於公布big day靚相，相中的她流露出幸福甜笑，身形高瘦的圈外老公亦難得曝光，一對新人十分匹配。

林泳淘昨晚終於公開老公的廬山真面目，有網民笑指新郎跟《100毛》創辦人林日曦撞樣。（IG圖片）

被批算天作之合

成為人妻的林泳淘在婚禮上特別開放，公然讓好姊妹「胸襲」自己。（IG圖片）

　　泳淘撰長文細訴與老公的緣份：「話說大約係一年前，我同林生因為輪流炒車，我就帶咗佢去拜拜還神，師傅見到我哋個八字就話『哇，你兩個人真係天作之合，個八字咁夾嘅，有無諗住結婚呀？』林生就好爽快咁話『有呀』。」泳淘又說：「跟住師傅好快就畀咗兩個日子我哋，而其中一個，咁啱就係我哋嘅拍拖紀念日，一切都是整定的！」她更甜絲絲向老公示愛：「我同林生都多了一個身份，多了一些家人，多了一份責任。但不變嘅係，我哋應該會繼續相愛相殺直到海枯石爛，直到生命終結，直到永遠永遠。」

林泳淘感激一班好姊妹見證她出嫁。（IG圖片）

生BB順其自然

林泳淘與老公相戀14年成婚，尤如童話故事般幸福。（IG圖片）

　　升呢「林太」的泳淘昨日接受《晴報》電話訪問，問她新婚生活是否甜蜜？她笑言︰「新婚第三日無乜特別，因為我哋一齊咗太耐喇，都係咁，同埋我哋喺屋企證婚，呢兩日都要忙執屋。」一切從簡的泳淘，透露她與老公的婚紗禮服在婚前數日才落實：「本來諗住好簡單咁着條裙就算，但啲朋友叫我哋唔好咁求其，婚紗店嘅人又好nice，叫我哋去試衫，所以就借咗婚紗禮服嚟簽紙。」對於「林太」這稱謂，她笑言︰「仲未習慣呀，反而林生（老公）比我仲開心。」婚後是否全力造人？泳淘表示︰「我哋都鍾意小朋友，但順其自然，無話一定要生BB，依家又有疫情，所以都唔急。」