【晴報專訊】張繼聰（阿聰）和周秀娜（Chrissie）在新片《馬達•蓮娜》中，分別挑戰飾演失婚落泊的士司機及身兼多職的單親媽媽，兩人在戲中的表現同樣獲讚，但他們坦言是佛系爭獎，反而希望更專注享受人生。

　　阿聰與Chrissie在《馬達•蓮娜》中一改戲路，他們不約而同認為角色的「貼地」與情感，是最具挑戰的地方。阿聰表示︰「呢部戲無任何花巧嘢，但正正因為角色咁基層、咁普通，要將佢哋人生嘅高低起跌演出嚟，令其他人有共鳴，就要將自己變成佢，呢點係最難。」Chrissie則說︰「『蓮娜』係一個單親媽媽，又經歷過失敗嘅感情，但喺咁辛苦嘅環境下有段愛情出現…最複雜係要演到嗰種掙扎同無奈。」

深入了解對方

兩人談情畫面唯美，但他們直言天氣凍，並不享受。

　　兩人已多次合作，拍攝時自然默契十足，但他們坦言今次合作才是兩人首次「深度交流」，Chrissie解釋︰「因為上次拍《女皇撞到正》題材輕鬆啲，但今次因為角色需要，我哋要互相深入了解，所以我哋拍之前不斷傾偈，早啲『發展感情』嘛！」

Chrissie與阿聰希望再合作，挑戰不同題材的電影。

　　阿聰補充道︰「我哋第一次合作，應該係十幾年前上電視台嘅遊戲節目，當時大家都係新人…以前大家可能對Chrissie有種固有形象，但其實我同佢合作咗咁多次，發覺佢好搞笑、個人好『抽離』，即係要同佢熟絡咗，先知道佢真正諗緊咩，其實入面有好多情感，好啱透過唔同角色表達出嚟。」阿聰又大讚Chrissie尚有很多「未知」，只要遇到適合的劇本，便能發掘更多可能性。

兩人趁拍攝空檔遊覽澳門，Chrissie笑說阿聰「好熟路」。（IG圖片）

　　阿聰的盛讚不無道理，皆因電影獲多個影展垂青，兩人真摰的演技好評如潮，更被看好衝擊影帝、影后的寶座。此時，兩人即互笠高帽，阿聰高呼︰「我對Chrissie好有信心！」Chrissie「回敬」道︰「我對阿聰好有信心！一齊有信心！」她感激阿聰在拍攝期間給予自己無限信心，與他做對手戲很有安全感，並說︰「有獎梗係好啦，始終人地認同你先會畀獎你，但盡自己能力就OK。」

對爭獎有信心

　　而阿聰也自言「有信心」︰「我對自己一向有信心，但嗰種信心唔係爭獎，因為獎項或者批評你都控制唔到，但身為一個演員咪盡做囉！到我覺得真係盡喇，最後觀眾鍾唔鍾意，我都問心無愧，呢種努力先係我有信心嘅地方。」但阿聰不忘強調，看好Chrissie奪獎︰「作為朋友，真係好想Chrissie可以攞獎，拍嘅時候我已經係咁同佢講。每年都有五個位（金像獎最佳女主角五強），唔係無佢份呀嘛？」

　　阿聰與Chrissie為《馬達•蓮娜》傾盡全力，阿聰更親自創作主題曲。歌手出身的阿聰近年主力拍戲，但他直言仍有音樂癮，明年更會出碟及開騷，「講真依家音樂係我副業，我好似啲總理，自己畀錢自己唱歌，好任性。呢個年代都唔興上咩流行榜啦，做音樂都係想同啲朋友開心下。」至於Chrissie閒時則會滑水、畫畫減壓，她笑謂︰「阿聰寫歌減壓，我就最鍾意（幫愛貓）『剷屎』，簡簡單單已經好開心！」

阿聰為新角色學跑步，日前更挑戰跑半馬。（IG圖片）