【晴報專訊】男團MIRROR的「人氣王」姜濤前晚推出個人紀錄片《答案》首集，一向貪靚的姜濤除了素顏上陣分享工作點滴，更透露經理人黃慧君（花姐）是他最信任的人。他又重提半年前在IG留下「I'm tired of everything（我對任何事都感到厭倦）」的主因︰「呢一年發生咗好多嘢，屋企、或者我朋友，所以嗰下突然間覺得自己有抑鬱症。」

　　入行三年的姜濤，上周於IG分享紀錄片《答案》的兩分多鐘預告，令姜糖（姜濤粉絲）熱切期待。前晚第一集正式在YouTube上架，截至昨晚九時已錄得接近23萬點擊，走勢凌厲。全長約六分鐘的第一集中，姜濤的跳舞師傅兼ERROR成員梁業（肥仔）、經理人花姐等，大談姜濤這位親密戰友。片中開首主要是姜濤與肥仔為合唱歌《特務肥姜2.0》在排舞室排舞的片段，素顏的姜濤全程戴口罩，又變身按摩師傅為老友按腰，足見二人的兄弟情。不過，肥仔搞笑寸爆姜濤︰「唔可以唔戴口罩、無化妝，幾重偶包（偶像包袱）。」

姜濤化身按摩師為肥仔按腰，表現有板有眼。(網上截圖)

維園狂奔避姜糖合照

姜濤最愛蒲維園街場，第一集剪輯了不少他打籃球的英姿。(網上截圖)

　　肥仔又爆料︰「排舞師問我哋排舞室射燈會唔會太刺眼，你知唔知佢（姜濤）講咩？佢話『因為我喺度』，佢係一個不知廉恥嘅(口靚)仔，姜濤已經進化咗，佢以前唔會講啲咁嘅嘢，佢真係囂咗。」姜濤聞言傻笑回應︰「我已經唔係以前嘅我。」紀錄片又捕捉姜濤在維園打籃球的片段，揭示深夜仍有不少姜糖在球場守候；姜濤為避免與粉絲合照，打完波即與友人做「快閃黨」拔足狂奔，非常搞笑。他坦言︰「打完波出完一身汗太污糟，唔好意思（合照）。」

自揭搵花姐傾偈減壓

姜濤在海旁盡訴心中情，大談過去一年的負面情緒。(網上截圖)

　　姜濤在片中提及在IG留下「I'm tired of everything（我對任何事都感到厭倦）」的發帖因由，並解構當時的心情︰「其實嗰日好好哋拍緊廣告，由朝早化妝到拍嘢之前都好正常。但唔知點解，突然間情緒就好低落，好似突然之間唔知道自己做緊啲乜。」他續稱︰「加上呢一年發生咗好多嘢，我屋企、或者我朋友（好友離世），嗰下突然覺得自己有抑鬱症，真係前一秒仲笑，下一秒就已經黑晒面。」他深深嘆氣，令姜糖睇到心痛。另一方面，花姐在片中踢爆姜濤童真一面︰「佢好似小朋友讀書攞到100分咁樣，跟住同啲同學仔講『你睇下我幾叻』。」姜濤直言花姐是自己最信任的人，會跟對方傾私人事︰「呢個係我對花姐嘅信任，佢知好多嘢係我阿媽都唔知。」難得偶像拍片分享內心世界，姜糖大讚他勇敢面對自己；有人亦勸他要好好處理情緒問題。

花姐深得姜濤信任，二人關係如同親人。