【晴報專訊】ViuTV選秀節目《全民造星IV》正熱播，當中21歲參賽者Ada仔（姜咏鑫），早前被傳是人氣男團MIRROR成員姜濤中學時期的暗戀對象。雖然雙方已各自否認傳言，但Ada仔昨日現身公開場合時，直言擔心成為「姜糖（姜濤粉絲）」公敵，更自爆曾被「姜糖」大罵。

Ada仔否認曾取笑姜濤肥。

　　《全民造星IV》參賽者Ada仔、Marf（邱彥筒）、Ivy So（蘇雅琳）及Yoyo（葛綽瑤）昨日出席口罩活動，吸引數十名粉絲到場支持。Ada仔早前被傳是姜濤中學期間的暗戀對象，她解釋與姜濤只在中一時相處短短一年，而且當時大家只得13歲，沒有多想感情事。問她是否曾取笑姜濤肥？Ada仔否認︰「無呀，我哋都係打打鬧鬧多。」

Marf開心獲得認同

　　提到Ada仔日前獲姜濤打氣，她直言收到師兄的短訊十分開心︰「依家佢做咗前輩支持我，我覺得自己好幸運。」擔心成為「姜糖」公敵？她表示︰「擔心㗎，我都試過被佢啲粉絲鬧，不過澄清件事後，啲粉絲都好理智，我做好自己份內事就得。」

（左起）Ivy So、Yoyo、Marf及Ada仔因《造星IV》帶挈人氣有升無減。

　　同場的Marf第二次出席公開活動，很開心獲粉絲舉牌支持。對於未正式出道已有忠實粉絲，Marf指不會增加入行信心︰「都係順住個勢行。（網民支持你單飛出道？）多謝大家，不過我唱歌方面未達到自己要求，跳舞亦永遠唔會有最好，但得到大家認同都好開心。」至於Yoyo和Ivy So參賽以來經常被批評「靠樣」入圍，Yoyo笑謂︰「我都唔係好靠到個樣，參賽者個個都好靚，只係風格唔同。」

Grace勉勵《造星IV》的參賽者。（IG圖片）

　　另外，近日盛傳將離開無綫的王君馨（Grace），日前不避嫌在IG上載《造星IV》的電視畫面，並撰長文表示喜歡這個節目︰「睇呢個節目，見到大家都係由零開始，不停有進步，愈嚟愈有自己的character（個性），睇到我好開心！」