• |
  • 極速報價
  • |
  • 會員
  • 產品服務 / 串流版
  • 設定

10/10/2017

政府釋出善意 比修改議事規則更重要

  • 加入最愛專欄
  • 收藏文章
  • 馬天娜

    馬天娜

    畢業後第一份工就係返金鐘,在職場輾輾轉轉,又回到了起點,而金鐘更由當年嘅商業中心,變成為香港權力核心。身為金鐘人,最鍾意就係收盡權力核心外圍同內圍嘅風,識破所有政客嘅語言偽術。

    立會透視鏡

  新立法年度開鑼,政治焦點除咗林鄭第一份《施政報告》之外,肯定就係財委會修改議事規則身上。陳健波繼續當選財委會主席一職之後,立即拋出「主席指引」一詞,務求盡快將一啲用嚟拉布嘅議事程序,透過自己主席嘅權力修改。

 

  「主席指引」其實主要係指將同一日之內唔同節數嘅財務委員會會議,都視為同一個會議。即係話,有議員因為行為問題被逐出會議廳,同一日所有節數嘅財委會,佢都被禁止進入會議廳開會;另外一個「指引」,對於泛民嘅爭議性就大少少,就係將縮短表決鐘時間由5分鐘減至1分鐘,議員反對的話本來可以每人有3分鐘陳述佢地嘅反對理由,「指引」建議縮到去1分鐘,減低拉布嘅效果。

 

  Tina就覺得,陳健波拋出呢招「主席指引」,可能係立法會秘書處連同法律顧問一齊諗出嚟嘅「鬼主意」,目的就係唔想經過特別委員會去商討,廢時失事,快快手出招對接拉布。至於最備受爭議、被認為係自行「閹割」議員權利嘅限制每名議員只能夠提出一條37A「臨時動議」,將要等成立特別委員會去處理。

 

  財委會係拉布嘅主戰場,正如陳健波所講,去年財委會因為「拉布」,批出嘅項目由前一年度88個,減至上年度得返29項目,涉及金額相差高達500億元。Tina相信,無論大家係幾咁支持泛民,面對呢堆數字,都唔可以否認泛民的確係有份「阻住地球轉」,窒礙一啲撥款通過(另一個有份嘅當然係梁振英,死都唔肯調動議程)。更重要嘅係,拉咗咁多年布,大家都唔覺得泛民有咩成功,一啲被認為係「魔鬼」撥款申請,最終一樣係被通過,通過之後亦唔見泛民好努力咁跟進,咁拉嚟又做乜呢?再咁搞落去,香港好多發展都將會遠遠落後,修改議事規則接拉布,可以話係刻不容緩。

 

  但利用呢啲「硬招」對付拉布之外,建制派同政府都可以使出一啲軟招去平息今次嘅「民憤」。政府推出一啲有較大爭議嘅撥款申請之前,不妨可以同泛民先進行溝通,睇下有無可能喺部分項目作出讓步。相信只要政府釋出善意,肯定可以解決財委會多年來嘅政治困局。

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新etnet健康網購,送你【健骨維他命D3(1000IU)】乙樽(價值$108)► 立即行動!

我要回應

你可能感興趣

放大顯示
風水蔣知識

精選文章

  • 生活
  • DIVA
  • 健康好人生
專業版
HV2
精裝版
SV2
串流版
IQ 登入
強化版
TQ
強化版
MQ