• |
  • 極速報價
  • |
  • 會員
  • 產品服務 / 串流版
  • 設定

09/01/2019

分歧

  • 加入最愛專欄
  • 收藏文章
  • 馬天娜

    馬天娜

    畢業後第一份工就係返金鐘,在職場輾輾轉轉,又回到了起點,而金鐘更由當年嘅商業中心,變成為香港權力核心。身為金鐘人,最鍾意就係收盡權力核心外圍同內圍嘅風,識破所有政客嘅語言偽術。

    立會透視鏡

  雖然係西曆新年,但大家都仍然係希望可以和氣生財、大吉大利,不過無論係政府高層,定係各黨派內部,對於兩件事都係出現幾大嘅分歧,講嘅就係減辣幫市民上車同埋三隧分流。

 

  自從去年9月樓市見頂回落之後,地產界唔少人求神拜佛咁要求政府快快減辣,但原來講得多自有「神」庇佑,「財神爺」陳茂波早幾日先話若時機合適,會研究放寬樓宇按揭成數,噚日特首林鄭月娥就即時出來反駁,提出若放寬按揭只會令巿民供樓負擔更大,強調「一定不會撤辣招,亦不會減辣」,擺到明就係一掌壓落去財爺把口,叫佢唔好多聲。

 

  呢單料政界都係當笑話咁睇,笑嘅當然係波波。有富貴建制派議員就話,不下一次同娥特私底下講要諗下撤辣,幫班首置後生仔上車,但娥特一早都表明心跡,話市場上唔夠能力嘅可以上資助房屋,夠能力嘅就一早靠自己或父幹買咗樓,只係有極少數有供樓能力但唔夠首期嘅,政府係好難去調整樓市政策去幫呢班人。更何況一放寬辣招,個市又癲返的話,千萬枝箭又係射向政府,呢個箭靶難以擔當。

 

  咁點解波波勇字當頭,連娥特嘅心意都未摸清就郁動佢最緊張嘅樓市政策?政壇中人就估計,波波對政府盤數瞭如指掌,佢多數擔心樓市持續龜速下跌,賣地收益可能會大幅縮減,嚟緊呢一年政府收入見紅都唔奇,咁樣佢將會成為自2004年以來第一位嘅「紅字財爺」。不過另外仲有一個可能,就係佢早已經知道娥特唔會肯減辣,但就係要show畀大家睇,佢係支持減辣幫市民完上車夢,只係娥特唔首肯,將個好人牌揸喺自己手。無論如何,要政府減辣,相信真係要再有一場金融海嘯先有機會。

 

  另一單就係三隧分流,下星期就會上立法會過一個無約束力嘅議案,之後先再過財委會。據Tina所聞,唔單止民建聯呢類直選建制派,就連富貴黨自由黨同經民聯,內部對政府方案都好大分歧,唔少議員都已經明言話會反對。所以Tina估計,下星期嘅辯論係罕有咁建制泛民齊插政府,最終呢個分流方案,唔分都會流咗去。

 

「港元定存息率」大比拼 食息都要食得醒 https://goo.gl/i9KA4Y
我要回應

你可能感興趣

  • 生活副刊
  • DIVA
  • 健康好人生