• |
  • 極速報價
  • |
  • 會員
  • 產品服務 / 串流版
  • 設定

10/07/2019

自由黨內訌無非為選票?

  • 加入最愛專欄
  • 收藏文章
  • 馬天娜

    馬天娜

    畢業後第一份工就係返金鐘,在職場輾輾轉轉,又回到了起點,而金鐘更由當年嘅商業中心,變成為香港權力核心。身為金鐘人,最鍾意就係收盡權力核心外圍同內圍嘅風,識破所有政客嘅語言偽術。

    立會透視鏡

  逃犯條例引發出嚟嘅問題一浪接一浪。喺林鄭「神隱」一星期後,「撤回」繼續成為禁忌語,繼而拋出「壽終正寢(The bill is dead)」論,不過依然未得到反對陣營接受,再加上聲望屬於「神枱級」嘅前首席大法官李國能亦支持撤回議案,兼且佢老人家同時贊成設立獨立調查委員會,令到反對修例陣營聲勢未見減弱。

 

  另邊廂,支持政府嘅建制派亦都有唔少問題。觸發撤回廿三條嘅「壞孩子」田大少,日前無啦啦炮轟自由黨黨友「廿蚊張」張宇人,連同另外幾位黨內元老公開要求張宇人,仿效田北俊當年做法,辭去行會職務,連帶自由黨黨魁鍾國斌亦都支持田嘅建議。「廿蚊張」即時發信反擊,強調自己做法無問題,無意辭任行會之餘, 仲話黨內嘅嘢應該留返黨內傾,唔應該劏開肚皮云云。

 

  自由黨呢單料成為建制陣營呢兩日嘅熱門議題,特別係田北俊同時辣埋葉劉淑儀要佢一同辭職,搞到葉太亦即刻開記招拋出「葡萄論」,令到建制派對田北俊非常反感。有建制派中人就話,今次田大少咁高調炮轟黨友同葉太的確係非比尋常,因為一般來講,黨內不和係唔會攤晒出來畀人睇,就算係黨友有幾唔著、你苦口婆心勸極都係無用,都唔應該用田大少呢種方式去搞,更遑論連葉太都要擺埋上枱。呢名建制派中人仲話,其他建制政黨都係好支持政府,民建聯係第一個用陳同佳案作引子支持政府修例嘅、工聯會更加身體力行去埋美國領事館抗議,要美國唔好干預,咁點解田大少又唔叫佢地喺行會嘅代表齊齊辭職呢?

 

  以田大少政治智慧加上佢商場上老謀深算,無理由會做蝕底嘅嘢。建制中人就估計,田大少咁做無非都係整色整水,諗住喺嚟緊選舉幫黨友撈返啲反修例嘅票,特別係唔少商界中人到而家都仲係極為反對修訂逃犯條例;張宇人咁高調支持政府,好可能令到自由黨嘅議席買少見少。田大少明知張宇人唔會辭行會,都要整封公開信,等全香港知道自由黨內有另一種聲音。至於呢一著對自由黨是福是禍,真係難以預計!

 

  至於只係搞直選嘅葉太無啦啦成為田少嘅箭靶?呢位建制人士笑言:「廿三條撤回一役之後,田少同葉太本身就肯定唔會有兩句,之後兩人仲有無背後互相放暗箭?睇兩人今次嘅表現,唔使畫公仔畫出腸喇啩?」

   

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

你可能感興趣

  • 生活副刊
  • DIVA
  • 健康好人生