• |
  • 極速報價
  • |
  • 會員
  • 產品服務 / 串流版
  • 設定

02/08/2019

獨立調查委員會的考量

  • 加入最愛專欄
  • 收藏文章
  • 馬天娜

    馬天娜

    畢業後第一份工就係返金鐘,在職場輾輾轉轉,又回到了起點,而金鐘更由當年嘅商業中心,變成為香港權力核心。身為金鐘人,最鍾意就係收盡權力核心外圍同內圍嘅風,識破所有政客嘅語言偽術。

    立會透視鏡

  先同讀者同《經濟通》編輯講聲唔好意思,Tina過去兩星期外遊,所以喺過去大半個月香港風雨飄遙嘅日子都未能供稿,真係深表歉意。喺外遊途中,Tina一直留意香港新聞,更收到唔少朋友Whatsapp,當朋友知道小妹外遊,劈頭第一句都係同我講:「呢個時間唔喺香港,你真係好彩。」的而且確,雖然係短暫離港,但外遊的確可以拋開因為亂局而帶來嘅壓抑情緒,抽離少少去睇返香港發生嘅問題。

 

  「反修例」活動發展到今時今日咁失控嘅情況,無人有水晶球預計得到,要解決現時嘅困局,有政圈人同Tina講,比起預計點樣發展更加困難。Tina不明所以,即時同呢位政圈中人講:「其實反修例人士嘅訴求,再加埋近期好多德高望重、地位非輕嘅人都不約而同提出,政府應該成立獨立調查委員會去調查成件事,咁咪可以等委員會用一年甚至兩年時間去處理,社會都應該可以平靜下來,其實唔係咁難呀?」

 

  政圈人搖搖頭道:「呢個先係最難搞嘅一環……」

 

  政圈人斷言,林鄭政府好早階段就已經將獨立調查委員會呢個方案上報中央,表明係要咁先可以解決當前香港困局,但中央早就落閘。落閘嘅原因估計有幾方面,第一個考量點,就係多個中央駐港機構都喺「反修例」之中有角色,包括中聯辦曾經叫齊人馬去西環接受「教育」統一愛國陣營口徑,要調查係唔係要搵埋中聯辦去見委員會?萬一委員會真係傳召西環,見同唔見都會引來一定政治風波,除非調查委員會係受到政府全面監控。但問題就係,呢個時勢成立調查委員會肯定無可能受到政府干預,變相得唔到保證之下,阿爺萬萬不能令到調查委員會成事。

 

  而從上周末港澳辦官員力挺香港警隊嘅言論亦可以理解得到,就算警隊喺今次事件上面有個別事宜真係做得唔好,阿爺亦一定係會保住執法者名聲,更加確認獨立調查委員會係無可能發生之事。

 

  較為次要嘅考慮點係,阿爺好可能認為反修例人士五大訴求根本無可能全部應承,就算只係應承成立獨立調查委員會,亦無人確保香港可以回歸安寧,既然係咁又何必拎石頭砸自己腳趾?

 

  咁香港自六七以來最大嘅亂局如何收科?呢位政圈人就話,你見林鄭乜都唔做,就知現時困局係幾咁惡搞,更嘆一口氣道:「除咗God bless HK,真係唔知可以講乜!」

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全城注視!銀行定存比較神器,助你搵到最佳息率!► 立即了解

我要回應

你可能感興趣

放大顯示
師傅靈靈法

職場新常態

精選文章

  • 生活
  • DIVA
  • 健康好人生
專業版
HV2
精裝版
SV2
串流版
IQ 登入
強化版
TQ
強化版
MQ