• |
  • 極速報價
  • |
  • 會員
  • 產品服務 / 串流版
  • 設定

01/11/2019

港府何時才不犯錯?

  • 加入最愛專欄
  • 收藏文章
  • 馬天娜

    馬天娜

    畢業後第一份工就係返金鐘,在職場輾輾轉轉,又回到了起點,而金鐘更由當年嘅商業中心,變成為香港權力核心。身為金鐘人,最鍾意就係收盡權力核心外圍同內圍嘅風,識破所有政客嘅語言偽術。

    立會透視鏡

  過去呢個星期,繼續發生唔少「大事件」,但正如過去四個月一樣,政府面對所有情況,進退失據係基本,大有大錯、小有小錯,真係寧願政府乜都唔做,因為唔做就唔會錯。

 

  第一錯,DQ黃之鋒。政府初期嘅區議會選舉策略,正如之前Tina所講,係諗住搵機會取消成個選舉,減低建制派流失大量議席嘅後果;但其後政府似乎另有睇法,認為有唔少市民討厭暴力事件,區議會選舉未必衰得晒,依家就決定邊行邊睇情況。政府中人其實都明白,DQ黃之鋒喺國際上嘅迴響有幾大,但唔畀佢選可能係阿爺派落嚟嘅硬任務,所以先諗到放生佢以外嘅所有人,希望將影響減到最低。但事實上,讀者應該都見到DQ黃之鋒喺美國方面嘅反應,相信迴響會陸續有來。

 

  不過,有建制派區選候選人對政府「樂觀」諗法感到驚奇,佢直言落區做街站畀人鬧已經預咗,依家係連掃樓都唔敢掃;因為以往嘅支持者,可能佢地嘅仔女都係支持反修例。呢位建制派中人,直言對選情非常悲觀,認為如果押後選舉會係對建制派係更好嘅策略。

 

  另一單影響國際觀感嘅就係萬聖節封鎖全港最「鬼」嘅蘭桂坊。警方出動大量防暴警察封蘭桂坊,令「過節」嘅市民遊客有入無出,自必然係掃晒興,仲要拉咗一位美籍人士,進一步增強外國對香港成為「警察社會」嘅印象,咁對香港係有利定有害呢?

 

  最後一單就係政府再次入禁制令,今次就係「封網」,唔畀網民喺互聯網上促進、鼓勵同煽動使用或威脅使用暴力。禁制令有無效其實都唔使Tina多講,網民演繹一種諗法嘅方式千變萬化,更唔好講大部分網站都唔喺香港。最令人諗唔通嘅係,明明煽動使用暴力本身已經係一個罪行,依家多此一舉去禁制呢一個罪行,政府唔係打亂章係乜?咁樣做嚇唔到一路做開嘅人,只係畀所有人一個感覺,政府係藥石亂投、無從入手。

 

  或者,犯錯就係今屆政府嘅本質,要佢唔犯錯就已經好難;但真心想問,犯少啲得唔得?

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

你可能感興趣

  • 生活副刊
  • DIVA
  • 健康好人生