• |
  • 極速報價
  • |
  • 會員
  • 產品服務 / 串流版
  • 設定

06/11/2019

何君堯2cm刀傷打救建制派!?

  • 加入最愛專欄
  • 收藏文章
  • 馬天娜

    馬天娜

    畢業後第一份工就係返金鐘,在職場輾輾轉轉,又回到了起點,而金鐘更由當年嘅商業中心,變成為香港權力核心。身為金鐘人,最鍾意就係收盡權力核心外圍同內圍嘅風,識破所有政客嘅語言偽術。

    立會透視鏡

  身處亂世,新聞好多時幾個鐘就變舊聞。當大家嘅焦點仲放喺兩位藍黃藝人辯論、科大生墮樓重創消息之上,今早(6日)又爆多單,立法會建制派之中最「炙手可熱」嘅何君堯,喺進行區議會選舉宣傳期間,被一名據稱係扮支持嘅人持刀刺傷,社交媒體洗板指數不亞於噚日場辯論。

 

  何受襲事件,雙方陣營當然係各自演繹自己嘅觀點同角度。反對派就質疑,成件事光天化日之下進行,肯定唔係好有心計咁預謀,絕不想牽扯到去抗爭運動之上;更有人喺網上質疑,成件事就係「台灣陳水扁」翻版,極可能係自編自導自演。建制派方面當然就群起攻擊反對派,指摘反對派縱容暴力升級云云。無他嘅,學阿叻話齋,睇得到嘅自然睇到,睇唔到嘅就乜都睇唔到,你係咩立場,就會有咩嘅眼光、眼界。

 

  不過Tina都要先祝何議員身體安康、早日復原,因為任何嘅暴力行為都係要不得。但今次何君堯受襲,對區議會能夠正正常常舉行,再增添唔少變數。

 

  有建制派區選候選人同Tina講,本來自己做嘅選舉工程都半停頓,起碼夜晚都唔敢再擺街站,依家何君堯受襲之後,會順勢連日間拉票活動都停止埋。咁樣可以向政府傳達一個訊息:「宣傳選舉好危險」。佢話唔知建制各黨派會唔會聯合做呢個行動,但自己幾位黨友已經同黨反映呢個情況,真係一齊做的話,就可以令人覺得成場選舉係對佢地不公,政府亦唔應該喺咁嘅氣氛之下進行選舉,「流選」嘅機會就大大增加。

 

  早前都已經有建制派透露,政府左度右度,覺得唔選所付出嘅成本比選更高,所以傾向繼續進行。依家何君堯受襲之後,再加上其他不明朗因素,「流選」嘅賠率又再次熱起嚟,難怪嗰位喺選戰打定輸數嘅候選人都話:「唔理何君堯受襲孰真孰假,但佢今次呢區區2cm刀傷,好可能係一個救全家!」是耶?非耶?

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

你可能感興趣

  • 生活副刊
  • DIVA
  • 健康好人生