• |
  • 極速報價
  • |
  • 會員
  • 產品服務 / 串流版
  • 設定

04/05/2020

梁君彥還配當立法會主席嗎?

  • 加入最愛專欄
  • 收藏文章
  • 馬天娜

    馬天娜

    畢業後第一份工就係返金鐘,在職場輾輾轉轉,又回到了起點,而金鐘更由當年嘅商業中心,變成為香港權力核心。身為金鐘人,最鍾意就係收盡權力核心外圍同內圍嘅風,識破所有政客嘅語言偽術。

    立會透視鏡

  郭榮鏗把持住立法會內務委員會主席選舉超過半年,最終搞到中聯辦港澳辦分別發聲,再觸發基本法22條嘅激辯,搞出咁多風波,Tina剛剛發現,原來成件事係同立法會主席梁君彥一啲關係都無。

 

  梁君彥今日剛剛公開表示,今年「3月底」已經開尋求外間資深大律師法律意見,指現任內會主席、民建聯嘅李慧琼係「有權力及責任」處理因選舉出現過度延誤而引致嘅問題,特別係處理重要及急切事務。

 

  呢個講法Tina特別括住兩個要點,第一係時間,即係3月底;第二係權力及責任。立法會個法律顧問團隊每年使咁多錢佢唔用,要再去用市民嘅錢搵外間法律意見我都算數,咁啱又得咁橋,搵嘅時間係3月底?3月底正正係疫情高峰之際,立法會連會都無得開,又係喺兩辦開火炮轟郭榮鏗之前,特別提出3月底,好明顯就係梁為自己開脫「監督不力」嘅責任,強調自己先知先覺已經搵人搞掂郭。

 

  另外佢引述外間法律意見指,李慧琼係「有權力及責任」處理事件。呢個膊真係卸得淋漓盡致,話畀李慧琼知道,佢有權之外,仲要係有「責」。Tina想問一問梁主席,內委會主席都只不過係大會副主席,如果大會副主席有責,咁大會副主席嘅責何在?一句就將手上面嘅炸彈遞畀第二個,呢個主席位真係易做。

 

  郭榮鏗今日亦都急召記者會回應梁君彥講法,強調法律意見只不過係建議,無法律效力一定要內會跟隨;佢更加質疑梁君彥有無呢個權去搞內會事務。郭榮鏗作出反撲就預計之內,但Tina估計,郭依家並唔希望由梁君彥或者李慧琼去處理佢嘅爛攤子,最好就係由中聯辦等引發更大政治危機,以增加非建制派喺立法會選舉嘅籌碼。但無論如何,郭榮鏗今次大鬧內會,表面上係泛民贏咗一場勝仗,搞到建制、兩辦倒瀉籮蟹,但實際上,郭正式令兩辦更主動、更高調介入香港內部事務,未來泛民主派政治上嘅活動空間,只會有少無多。

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經 ‧ 生活App獨家「銀行匯率比較」功能 立即下載 iOS/Android

我要回應

你可能感興趣

  • 生活副刊
  • DIVA
  • 健康好人生