• |
  • 極速報價
  • |
  • 會員
  • 產品服務 / 串流版
  • 設定

14/10/2020

押後宣讀施政報告觸怒建制派

  • 加入最愛專欄
  • 收藏文章
  • 馬天娜

    馬天娜

    畢業後第一份工就係返金鐘,在職場輾輾轉轉,又回到了起點,而金鐘更由當年嘅商業中心,變成為香港權力核心。身為金鐘人,最鍾意就係收盡權力核心外圍同內圍嘅風,識破所有政客嘅語言偽術。

    立會透視鏡

 

  「浪卡」超遠距離襲港,香港天文台罕有咁做咗一次黃大仙,應打工仔所求全日「停市」,卡住大家唔使上班之外,仲卡埋一年一度嘅施政報告。

 

  特首林鄭月娥喺「浪卡」嚟之前,突然宣布押後原定今日(14日)喺立法會大會宣讀嘅施政報告。施政報告向來都係每年頭等大事,亦係特區政府每年度工作嘅依歸,押後宣讀施政報告更加係頭等之中嘅頭等,無返咁重量級嘅理由,都可能塞得住全港市民把口。

 

  林鄭押後宣讀嘅理由,係經過嚴重疫情後,社會期盼可以重啟經濟,而內地疫情受控下經濟已有所復甦,香港要重啟經濟離不開內地支持,已梳理了一系列措施,要求中央考慮及支持,但因為措施涉及範圍非常廣泛,並非單一部委可以決定,故中央希望林鄭今個月下旬可以啟程前往北京,參與不同部委協調會議,商討一系列中央支援特區政策,所以最終決定押後宣讀。

 

  呢個理由,表面上睇係堂而皇之,但實際上真係漏洞處處。首先,如果施政報告入面有好多措施要同阿爺好好咁傾,得到支持先推出嘅,根本就唔會早早寫喺施政報告入面,而係等到阿爺拍板先再另外公布,呢個一直都係政府一貫嘅做法,亦都係林鄭自己所講嘅「成熟一項推一項」;如果那個涉及內地嘅政策真係對香港咁重要,喺施政報告中佔好大份量的話,林鄭應該更早就得到阿爺同各相關部委嘅首肯先寫落去,唔可能宣布之前兩日先話延遲,如果未得到阿爺話ok就已經寫咗喺施政報告入面,咁就係擺阿爺上檯,畀個豹子膽林鄭都唔敢。所以只要細心咁睇,林鄭所講嘅理由,係根本站不住腳。

 

  施政報告宣告嘅日子同時間,撞到正國家主席習近平南巡深圳講話,唯一合理嘅解釋,就係林鄭就算唔使親自上深圳聽指導思想,亦絕唔可能「僭越」同國家主席喺同一時間點齊齊講話,一個「不能說的秘密」,只可以用以上嘅理由去推搪。

 

  對於林鄭押後施政報告,建制派都真係敢怒不敢言。幾個民選建制政黨,雖然都出嚟撐林鄭,但私底下都對林鄭非常不滿,特別係好多市民都想知政府仲有咩政策幫到民生,咁樣押後,建制做地區工作嘅真係有口難言。更令建制不滿嘅係,林鄭押後宣讀就可以上深圳「聽書」,建制派議員就要留守議會無得遠距離見一見習主席,建制派唔一肚氣就假啦!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經.生活App 精明外匯買賣三招「睇圖-比較匯率-預設提示」iOS / Android / Huawei

我要回應

你可能感興趣

  • 生活副刊
  • DIVA
  • 健康好人生