• |
  • 極速報價
  • |
  • 會員
  • 產品服務 / 串流版
  • 設定

20/11/2020

香港將成為「批鬥」之城

  • 加入最愛專欄
  • 收藏文章
  • 馬天娜

    馬天娜

    畢業後第一份工就係返金鐘,在職場輾輾轉轉,又回到了起點,而金鐘更由當年嘅商業中心,變成為香港權力核心。身為金鐘人,最鍾意就係收盡權力核心外圍同內圍嘅風,識破所有政客嘅語言偽術。

    立會透視鏡

 

  呢個星期,本來想寫下泛民總辭係幾咁愚蠢,不過剛剛日前港澳辦常務副主任張曉明以視像方式參與律政司喺香港舉辦嘅《基本法》頒布30周年法律高峰論壇上面嘅發言,充分咁顯示阿爺要為香港「撥亂反正」嘅決心,不容許有半點雜音,但同時間將會令到香港喺未來一段時間成為「批鬥」之都,政治爭拗將會持續,專欄都要多加著墨。

 

  泛民辭職唔撈係唔少人意料之中,但估唔到嘅係,佢地真係選擇總辭、毫無保留咁總辭(淨返嘅醫學界陳沛然同熱血公民鄭松泰係非建制),呢一步棋真係錯到離晒譜。

 

  首先,要總辭的話,應該學陳志全、陳淑莊同朱凱迪,喺9月30日就唔撈。如果佢地當日覺得支持者係希望佢地留喺議會有所「作為」,依家總辭,咁又有乜作為呢?如果佢地點人數、打拉布係選民支持佢地咁做嘅,點解唔留返兩三個人留喺議會,專做點人數工作?從建制媒體嘅評論睇到,總辭好大機會令泛民議員下年唔能夠再選,既然係咁,泛民嘅策略係好應該留守議會奮力一博,總辭,真係只有九流軍師先會做嘅建議。

 

  再講返張副主任嘅言論,佢喺《基本法》論壇致辭,指維護國家主權安全發展利益係一國兩制嘅首要宗旨,「在香港社會崇尚的民主、自由、人權等核心價值之前,應當加上『愛國』一詞」。他又話,要求由愛國者治港係「天經地義」,愛國愛港者治港,反中亂港者出局,既係一國兩制下嘅政治規矩,「現在亦已成為一項法律規範」。

 

  呢翻說話,有建制派中人認為,係阿爺想徹底斬草除根。由親中媒體率先向四名被DQ嘅前議員先行開刀,其後阿爺隨即DQ嘅事件去睇,任何人,只要透露出半點建制陣營覺得「有可能」係唔愛國嘅言論,就會被人大力「批鬥」,冒求將星星之火儘早撲滅。新近就有科大社會科學部講座教授李靜君喺一個論壇提出「我認為我們不屬於中國,而是屬於全世界」嘅言論,就被建制媒體標為港獨分子去睇,相信類似嘅批鬥事件會持續一段頗長時間。咁樣對於香港嘅政治傷口中癒合,又係唔係有害無益呢?

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新直播節目《hot talk 1點鐘》強勁嘉賓陣容 擴視野 添智慧 玩埋「睇住賞」 贏熱爆獎品 ► 即睇

我要回應

你可能感興趣

  • 生活副刊
  • DIVA
  • 健康好人生