• |
  • 極速報價
  • |
  • 會員
  • 產品服務 / 串流版
  • 設定

28/06/2017

高永文派散水餅幫襯社企 西環契仔冇得「見習」

  • 加入最愛專欄
  • 收藏文章
  • Jenny Yin

    Jenny Yin

    於傳媒行業打滾多年,其實亦是打雜多年,八卦天性難改,日常穿梭立法會及政總之間,閒時金鐘中環high tea、購物,順道收集情報。

    言歸政傳

  派散水餅從來都是一門既高深莫測嘅藝術,時間、地點、內容都配合得好,咁喺其他同事心目中就會「即使你離開,我熱情未改」。今屆不少局長都會卸任,「民望高」高永文今日最後一次以食衛局局長身份出席立會會議,仲親手派喺社企購買嘅「散水餅」畀議員食,唔使名牌五星酒店出品,一樣氹得佢哋好開心。

 

 

高永文派散水餅 同蕭偉強齊齊卸任「鬆返口氣」

 

  臨別秋波,高永文就好唔捨得行家同議員,今日佢特登喺社企iBakery愛烘焙(即係政總嗰間)買咗啲「散水餅」請議事廳嘅議員食,仲賣口乖話好多謝咁多位議員五年來代表市民,為政府提供咗好多意見。

 

  今日終於完咗最後一日嘅質詢,Jenny估計,高醫生心底應該大叫咗句「I am free!」不過溫文嘅佢當然唔會咁嗌出來,只係淡淡咁講咗句「真係鬆咗一口氣!」。佢仲出口術氹我哋班記者,話最唔捨得就係喺會議廳前,被攝影機同傳媒包圍嘅大陣象添!高醫生原來有時都幾口甜舌滑?!

 

  同高醫生一樣就快卸任嘅勞福局局長蕭偉強都同Jenny講,離開議事廳唔使再做問責官員,唔只係鬆一口氣,「直情係鬆好多口氣呀!」梗係啦!佢之前講過做局長「每日都好長」,而家終於完咗最後一次質詢,難怪成個人睇落都輕鬆咗唔少。不過,佢都有話唔捨得啲同事,讚大家做事好有心,仲話好好彩立法會同傳媒對自己「比較仁慈」。

 

  而同樣唔過渡新班子嘅財經事務及庫務局局長陳家強,今日都「口花花」開會前向記者笑住咁講:「最唔捨得你哋。」

 

「見習」晚宴 點解「契仔」謝偉俊冇份去?

 

  講開又講,今日立法會就好似冇乜特別嘢搞,議員同官員都係咁出出入入,影吓相又同記者們吹吓水咁。吹水八卦呢啲咁「正經」嘅嘢點少得我Jenny!適逢習大大就快訪港,好多議員都一早乖乖地交咗回條,以防遲咗見唔到大大一面呀!不過,大家做過學生都知,總有幾個人唔記得交、唔記得帶回條咁嘅,謝偉俊(阿Paul)就聲稱因為遲交咗成個禮拜,所以冇份去「見習」喇,真係慘豬豬!

 

  作為咁多個建制之中唯一一個「不獲見習機會」嘅議員,被人戲稱「西環契仔」嘅阿Paul自然就成為大家八卦嘅重點啦。其實有幾位唔同派別嘅議員都同Jenny講,遲交還遲交,都冇理由就咁樣漏低佢一個,應該仲有啲原因嘅......

 

  事關佢哋爆畀Jenny聽,有啲議員一樣大頭蝦過咗截止日期交回條都一樣有得去,當中仲有民主派嘅議員添!唔通真係因為之前報道所講咁,阿Paul做咗查UGL事件嘅專責委員會主席,又反對解散委員會,所以得罪咗負責安排活動嘅CY?如果係咁,點解連畀CY話誹謗嘅梁繼昌又有份去呢?

 

  後來有議員同返Jenny講,話阿Paul其實遲咗成個禮拜咁多,人哋想酌情處理都難啦。阿Paul,唔好唔開心啦,30號留喺屋企睇電視都唔錯吖,唔使驚塞車,又唔使同人逼。話唔定遲吓有得私下見習大大呢?希望在明天呀嘛!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

「港元定存息率」大比拼 食息都要食得醒 https://goo.gl/i9KA4Y
我要回應

你可能感興趣

  • 生活副刊
  • DIVA
  • 健康好人生