• |
  • 極速報價
  • |
  • 會員
  • 產品服務 / 串流版
  • 設定

14/08/2017

梵哥玩推車 陳恒鑌「打跛腳都唔使憂」

  • 加入最愛專欄
  • 收藏文章
  • Jenny Yin

    Jenny Yin

    於傳媒行業打滾多年,其實亦是打雜多年,八卦天性難改,日常穿梭立法會及政總之間,閒時金鐘中環high tea、購物,順道收集情報。

    言歸政傳

  唔少人每日返工返學都會搭小巴,如果趕時間,啱啱你又係第17個人,嗰吓都咪話唔忟!如果要推輪椅出入醫院,本來有平、靚、正嘅小巴可以搭,但有時因為滿座或者上落不便,就要焗住搭的士或者自己揸車。好快就投入服務嘅19座低地台小巴就簡直係Jenny救星!

 

  話說,今日運輸及房屋局局長陳帆(梵哥),同埋勞工及福利局局長羅致光就齊齊去參觀新型(其實係加長咗少少,再加個新設計車頭)19座小巴,仲有可供輪椅上落嘅19座低地台小巴,雖然呢批新型小巴未完成晒啲審批,但係兩位局長就可以率先上車睇吓,感受吓呢兩架變大咗嘅「小巴Plus」喇!

 

陳議員你就好啦!

 

陳恒鑌坐定定等梵哥推

 

  比起只係加長咗少少嘅新型19座小巴,羅局長就對另一款新引入嘅可供輪椅上落低地台小巴勁有興趣喇!可以話讚不絕口,係咁喺大讚呢款小巴可以方便啲公公婆婆同埋殘疾人士上落,仲叫小巴公司入多啲「貨」喎!Jenny聽聞呢款小巴會率先行走瑪麗醫院線。

 

  講咁耐,梗係要搵人落場試用一下啦!梵哥唔輸蝕呀,一於叫民建制嘅陳恒鑌議員坐落輪椅到,自己就親身上陣試推陳議員上車添!睇吓順唔順暢!嘩!有局長幫你推輪椅,陳議員你今次真係打跛腳都唔使憂啦!

 

  不過,Jenny就留意到,呢款低地台小巴有個輪椅專屬位置,再加普通座位19個,咁係唔係即係話可以坐到20個人?田二少田北辰就同Jenny講本身係想嘅,不過而家法例就未批,所以都係未可以咁做住。梵哥就話小巴滿咗19個客就唔可以再上㗎啦!所以鼓勵市民見到輪椅人士就讓座。香港人一向有愛心,讓座唔係難事,Jenny只係怕到時又多咗好多「花生友」為咗讓唔讓畀人而拍片上網咋。

 

19+1」幾時得?CEO怕要有排等


  大家都知上小巴要「嘟」八達通先噃,如果市民要讓座,咁「嘟」咗嘅錢又點計呢?唔通每次都要麻煩司機大哥同下一架車單聲?好麻煩噃!而且,既然有個輪椅位,Jenny估嗰位輪椅人士都唔會棄輪椅坐普通位吧?到時吉咗空位出嚟咪好浪費?民建聯劉國勳同Jenny講,都好認同要咁樣讓座法確係幾麻煩,但係要修例,估計最快都要等立法會復會之後先傾到喇!

 

  Jenny就呢樣嘢問返專營專線小巴嘅進智公交CEO陳文俊,佢就對呢個「19+1」係短期內傾掂似乎就太唔樂觀喇!皆因佢話:「由16座加到19座都傾咗廿幾年,邊有咁快傾好呀!」Jenny就覺得便民嘅嘢,事在人為嘅啫!一地兩檢都係咁啦,區區一架小巴加個位啫,又點會難到政府呢!

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

你可能感興趣

  • 生活副刊
  • DIVA
  • 健康好人生