• |
  • 極速報價
  • |
  • 會員
  • 產品服務 / 串流版
  • 設定

15/08/2017

林鄭暑假冇時停 民望今次有得升

  • 加入最愛專欄
  • 收藏文章
  • Jenny Yin

    Jenny Yin

    於傳媒行業打滾多年,其實亦是打雜多年,八卦天性難改,日常穿梭立法會及政總之間,閒時金鐘中環high tea、購物,順道收集情報。

    言歸政傳

  行會放咗兩個星期嘅「小暑假」,今日Jenny又喺特首辦見返特首林鄭月娥啦!林鄭都話自己今個暑假去咗好多地方,獲益良多咁話喎!其實Jenny真心覺得放得個兩個星期真係唔夠,不過林鄭出晒名勤力,你叫佢放多兩日假,話唔定佢反而會唔自在!

 

 

其中4位得獎學生,左一就係司徒健、左二就係梁鈺鈿。


為追夢可以去到幾盡?

 

  林鄭一早開完行會,晏晝就即刻去「香港卓越獎學金計劃頒獎禮」做頒獎嘉賓喇!去哈佛、牛津升學嘅同學仔梗係有啦!不過,傳統學科之外,有啲同學仔仲會修讀考古學、音樂指揮、時尚攝影等香港少見嘅學科。

 

  當中揀咗去美國讀指揮嘅司徒健同學原本學二胡嘅,佢同Jenny講,有次喺瑞士聽完一次音樂會之後,忽然「叮」一聲,決定裸辭香港中樂團份全職,全心準備報讀音樂指揮學位。

 

  佢同Jenny講自己一向好「決斷」,試過因為同家人意見不合而撕爛咗張會考證書添!有決心係好,但下次可以唔使咁激嘅!點都好,Jenny真係好佩服佢呢一份坐言起行嘅魄力!日後,話唔定學成歸來仲可以喺西九表演,順勢等埋個文化局成立,撈返個一官半職添!

 

  講起一官半職,同場梁鈺鈿同學就明言想入政府,由內部開始進行改革,去解決香港嘅Knowledge Gap(知識鴻溝)喎!之但係,而家政府啲政策,牽涉好多程序,好難話改就改,攪唔好,會唔會擔心到自己退休時都未改到呀?梁同學始終人生經驗未夠,畀記者呢一問拋窒咗,但之後反應都算幾快!睇嚟Jenny都要Mark實呢位同學仔,話唔定有朝一日,又會喺某張委任名單上面見到佢個名喇!

 

 

林鄭嘅施政報告究竟會為佢提升民望定相反呢?

 

林鄭民望有得升

 

  同學仔做得好有獎學金鼓勵,官員做得好唔好,就由民調數字反映。港大民意研究計劃,今個月2號去到7號做咗新一輪政府官員民意調查,特首林鄭月娥民望升咗啲啲去到59分,支持率有五成二,反對率就三成七,即係支持佢做特首嘅人多過反對嘅人,民研就界定為「表現成功」。由此可見,林鄭似乎仲有蜜月期。不過,立法會新一個會期仲未開始,林鄭仲未個個月去立法會答問,仲有個殺手鐧《施政報告》未出,究竟係「言多必失」定「言而有物」到時就見真章喇!


  
三位司長又點呢?出名同CE一樣咁勤力、放都唔放嘅政務司司長張建宗雖然同上次比跌咗1.4分,但仲有56.2分,係三司中最高得分!至於主力Sell「一地兩檢」嘅律政司司長袁國強得分,就下跌1.9分去到50.9分,排第二;財政司司長陳茂波(波叔)今次民調分數就升咗少少,有41.2分。講時講近排都冇咩新聞會「辣」到波叔,頂多係佢重申無意樓市減辣,所以Jenny覺得波叔呢個分數,可說不過不失㗎喇!

 

劉江華民望淨值「見紅」


  
局長方面,做過新聞處處長嘅商務及經濟發展局長邱騰華民望最高,民望淨值35個百分比,同樣都做過新聞處處長嘅聶德權就爭少少喇,民望淨值係10個百分比。講到民望最低嘅局長,就係「寧願一生都不說話,都不想講假說話」嘅民政事務局長劉江華,Jenny再望多望個表,發現原來佢係唯一一個民望淨值「見紅」嘅局長,劉局長啊!你要多啲爭取表現至得喇!至於勞工及福利局長羅致光就係民意跌幅最大嘅局長,Jenny真係有啲意外,唔通係因為副局唔知最低工資累咗佢?


  
講時講,新班子上任成個幾月,Jenny梗係已經認得晒佢哋啦,但公眾又對佢哋認知又有幾多呢?喺認知率不足50%嘅局長當中,邱騰華其實只係差少少達標咋,佢認知率係49.8%,而最低嘅原來係發展局局長黃偉綸,得30%咋。


  
嗱!根據民研計劃的標準同定義,綜合認知率同民望分數,今次冇官員屬於「表現理想」,林鄭係「表現成功」,不過都好彩冇官員屬於「表現失敗」或「表現拙劣」。

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

你可能感興趣

  • 生活副刊
  • DIVA
  • 健康好人生