• |
  • 極速報價
  • |
  • 會員
  • 產品服務 / 串流版
  • 設定
過往專欄
言歸政傳
言歸政傳政經頑石不低頭為理發聲郎旋風薰香療法男士診症室抵玩自助遊句句有骨星座命理念力•氣功手機應用tips睛益求精嚴浩 LIKE!見微知著跟著陶冬找美食數碼潮人廣告有晴踏出退休第一步識食•惜食有種CEO叫做莊潮爆網事羅湖橋兩邊娛樂酷辣辣思歪思正十萬八千里樂本健‧教室特首選舉趣食60秒入廚101觀自然•觀香港有種生活政本清源心筆在妍維基解碼IT戰國誌煮酒論政今日趣聞馬壇.誌趣星期二周融愛瘋Apps美美道來大國崛起智醒日誌@中小企「營」刃而解Smart Buying甜品工房Education Calculator家事法庭升學信箱新手媽媽怪獸父母營營樂樂親子專題財富非常道謝國忠看勢獨唱團京城近觀原來如此乾坤挪移街坊食神Keyman森巴舞睇波LU文化導遊精神解碼抗癌兵團有營生活吾道崢廣見聞名家名畫商務英語型品薈我心中的米芝蓮歐洲直擊旅途中食得喜Leadership Coaching一哥教攝影心晴百態乳你同行專科專論人愛衣裝Word Discovery科技趨勢愛情故事投資達人政治擂台藝術投資秘笈抗癌點滴寵物情緣淘寶lization電影一線網絡鬼故主.管微博一分鐘管理娛樂有理進攻SAT古今名錶政‧經‧女人The Beauty Factor議會內外石油戰爭男女情色談金說匯風水環境學細味建築健康快車Green Hong Kong星光伴我行我吃過的米芝蓮A+孩子上海觀察京城札記鐵娘駕到食客三千創富新思維海外升學信箱Today's Web藝術投資世界在讀什麼-雷美華潮得起Business English飛越地球村紅酒情報職場物語股場琦手

21/08/2017

青嶼幹線雙向收費未搞掂 塞車塞到人都癲

  • 收藏文章
  • Jenny Yin

    Jenny Yin

    於傳媒行業打滾多年,其實亦是打雜多年,八卦天性難改,日常穿梭立法會及政總之間,閒時金鐘中環high tea、購物,順道收集情報。

    言歸政傳

今日又係Blue Monday,但係對於住喺屯門、元朗、天水圍嘅新界西朋友仔嚟講,可能話係Black Monday會貼切啲!事關運輸署噚日開始喺青嶼幹線實施雙向收費,今日就係改變模式之後嘅第一個工作日,結果去機場條路出現大塞車,條龍仲去到屯門公路,有成10公里咁長添!搞到附近啲交通都大受影響,大欖隧道往九龍方要間歇性封閉,最後塞咗成三個鐘頭!Jenny喺面書都見到有朋友因為咁而miss咗班機,仲有小妹喺嗰邊住嘅好姊妹因為咁而遲到。面書上一片怨聲載道,個個「媽媽」聲!

 

塞死晒!全部塞死晒!連大欖隧道都不能倖免。

 

封5條繳費通道 市民火都嚟

 

  雖說住香港「大西北」嘅居民一向以性格堅韌見稱,屯門公路塞車嘅大場面早已見怪不怪,但係今日嘅擠塞情況之差,令佢哋都忍受唔住要爆喇!究竟點解會塞得咁誇張呢?

 

  嗱!根據運輸署上個星期公布,噚日(20號)凌晨零時起已經實施咗雙向收費安排,往機場方向嘅大嶼山收費廣場,因為要安裝收費設施同埋做相關土木工程,第13至17號嗰5條繳費通道,會一直封閉到12月。結果今朝(21日)只有2條自動繳費通道及4條人手繳費通道做嘢,比平日少咗近半,完全無法應付工作日嘅交通流量,10里車龍就係咁育成咗喇!

 

  塞到天昏地暗之時,運輸署嗰邊就話係因為啲司機未習慣個新安排,要多啲時間嚟找錢喎!聽日就會開多兩個收費亭,希望可以疏導車流。有網民聽到呢個回覆真係火都嚟,就話:「好明顯塞車嘅司機全部都一定未出過城啦!紅隧西隧都一定未行過。」、「全部都係新丁,的士佬都係第一日返工(好似係)」等等,暗串當局推卸責任、亦有人明鬧「未搞掂,就唔好實行啦!」、「衰咗仲要死撐!」、「開學日就大劑」。

 

  而立法會交通事務委員會主席陳恒鑌就話現場仲有工程做緊,即使聽日加開收費亭應該都係紓緩唔到塞車問題,認為當局輕視改變模式的影響。佢都好坦白咁話,工程完成前其實唔需要急於實施雙向收費,或者考慮分階段收費,又或者當局可以考慮24小時施工去加快進度。

 

運輸及房屋局長陳帆(左一)同署理運輸署署長李萃珍(左二)咋咋臨喺傍晚收工時間之前去到現場視察。(新聞處圖片)

 

鄺神爭啲「中招」 Sammi樂觀面對

 

  塞車影響搵食、去旅行,唔只星斗市民嘈到拆天,連立法會議員都爭啲「中招」。好似一樣係「新界西之友」嘅鄺神-鄺俊宇咁,平日搭開巴士由天水圍返金鐘立法會,好彩臨出門口睇睇交通情況,轉咗搭西鐵。如果唔係應該會都開完佢先返到立法會喇!新民黨離島區議員傅曉琳(Sammi)大本營係東涌,都同Jenny大嘆一聲,今日佢嗰區身受其害,希望明天會更好咁話!Sammi你真樂觀!

 

  眼見塞車塞到個個市民仲㷫過今日嘅天氣,運輸及房屋局長陳帆等人咋咋臨喺傍晚收工時間之前去到現場視察下咩環境先!轉個頭就有架工程車送嚟一個新收費亭連安裝。署理運輸署署長李萃珍喺見傳媒時就「耍冧」,話今朝嘅擠塞對市民造成影響「唔好意思」,又解釋多次係由於駕駛者及收費員尚未適應新措施,但覺得係有改善嘅地方。唔知大家對呢個道歉收唔收貨呢?

 

  哎呀!Jenny一聽12月先完成收費亭工程,就非常憂心,咁之後日子點算?其實雙向收費係為咗配合港珠澳大橋第時通車用嘅,keep住用返單向收費,直至至少八成收費亭都投入服務,咁就可以減低擾民程度啦!反正港珠澳大橋通車年底係咪可以如期通車仍然係未知之數啊!Anyway,各位「新界西之友」聽日祈求西鐵千萬唔好壞!如果有讀者趕飛機的話,最好搭港鐵喇!加油啊!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

你可能感興趣

  • 生活副刊
  • DIVA
  • 健康好人生