• |
  • 極速報價
  • |
  • 會員
  • 產品服務 / 串流版
  • 設定

04/09/2017

摩天輪何去何從?

  • 加入最愛專欄
  • 收藏文章
  • Jenny Yin

    Jenny Yin

    於傳媒行業打滾多年,其實亦是打雜多年,八卦天性難改,日常穿梭立法會及政總之間,閒時金鐘中環high tea、購物,順道收集情報。

    言歸政傳

  中環新海濱摩天輪係唔少旅客訪港必到之處,Jenny啲外國親友嚟親香港都會去搭一個轉,話始終最愛維港夜景。不過,摩天輪因為新舊營辦商個交接問題,上月底突然間停業,牽扯出背後一大串爭拗。究竟是政策出錯定商戰橋段?如果今個禮拜都拆唔掂,歌仔唱嘅:「天荒地老「榴槤」在摩天輪!」恐怕嗰個「榴槤」要未來一、兩年都要放返落地先喇!

 

中環新海濱摩天輪係唔少旅客訪港必到之處。
  

原營辦商Swiss AEX名落孫山
 
  一切由2015年中西區區議會話中環新海濱用地要重新招標開始,政府舊年11月就為中環新海濱摩天輪用地新嘅3年短期租約進行公開招標,入標嘅當然有原本營辦商Swiss AEX啦,本來佢哋諗住招標要求咁嚴格,應該冇咩競爭對手,點知殺出咗The Entertainment Corporation Limite(TECL)。經評核投標者的經驗、用地整體設計、日常運作、票價、社區參與活動等等範疇之後,今年523日政府公布新的營辦商TECL中標。
 
1
蚊公司TECL點解中標?
 
  
原營辦商Swiss AEX就質疑過中標嘅新營辦商TECL,係一間以1蚊成立嘅空殼公司,又冇營運摩天輪經驗,所以TECL令佢哋「上下均感到驚訝和失望」。但發展局就話,佢哋只係要求營辦商在過去10年內須有至少一年相關經驗,而家新營辦商嘅負責人係符合有關要求㗎!
 
  
究竟呢間TECL係乜東東呢?Jenny就去咗公司註冊處度check咗一下資料,發現新TECL係舊年1117日以1蚊資金成立,公司董事和秘書分別係Denmark Michael Edward Sean(鄧米高)Goforth Frederick William。呢個鄧米高其實同時擔任7間公司嘅董事,再翻查下資料,其中一間叫The Great European Carnival(TGEC)嘅公司,就主辦過2014年至2016年「友邦歐陸嘉年華」。嗯……Jenny喺網上查過資料,就咁睇似乎真係唔算有營運摩天輪經驗噃!
 
Swiss AEX
TECL傾唔掂數
 
  之不過,發展局標書要求「參與投標公司或機構的負責人在過策劃、營運及管理摩天輪或附帶機動遊戲機的主題樂園/嘉年華會的經驗」,同3年前要求有10年營運及管理摩天輪經驗唔同,新營辦商嘅負責人(即鄧米高啦!)打埋算盤又真係符合有關要求,當然,Jenny就唔知佢係咪有其他瓣數係同營運摩天輪有關啦!


  然後,今年7月開始Swiss AEX就開始同TECL傾下點樣將個摩天輪易手。據Jenny所知,本來雙方都同意咗個價錢㗎喇!點知TECL交唔出資金證明,搞到Swiss AEX話唔敢賣。轉個頭政府就話公布招標結果後,已收咗新營辦商6個月的租金作為保證金。唔通就係畀晒保證金,所以唔記得整資金證明?
 
TECL
將開記招 「花生」源源不絕
 
  
由於而家都傾唔掂數,原營辦商Swiss AEX就話只好拆咗個摩天輪,咁樣先可以準時10月底交返撻哋出來,仲強調一旦拆卸入面嘅組件唔會成為垃圾。睇嚟佢哋想另起爐灶噃!至於涉事另一方嘅TECL到而家都仲未出過聲,Jenny收到風佢哋將今個禮拜內就會召開記者會交代詳情。睇來「花生」將會源源不絕!


  
今日Jenny出活動時見到商務及經濟發展局局長邱騰華,話晒呢次摩天輪風波都同外國公司投資有關,當然問下佢點收科好啦!邱局長就話,希望新舊營運商交接以大局及整體效益出發,仲表示了解到中間存在複雜嘅合約同埋招標問題云云,之後就將個波推返去發展局度,話發展局將會處理有關嘅事宜咁話。之不過,發展局其實又一早講咗,「由於買賣摩天輪屬新舊營辦商之間的商業決定,政府並沒有規定新營辦商必須使用現有摩天輪。」今次究竟點收科呢?
 
商戰無情 鹿死誰手
 
  
有縱橫商場多年嘅朋友同Jenny分析今次呢件事,佢話而家表面咁睇,在商言商,TGEC其實好聰明。因為要重新起一個摩天輪唔平,斷估都要億億聲,擁有摩天輪嘅Swiss AEX當然亦知道啦,所以當日開價亦唔會仁慈,雙方拉鋸之間,時間就係最大籌碼。當地皮交吉日臨近,如果Swiss AEX要拆摩天輪,其實又係另一筆開支,本身已經因為投唔到標而無法回本嘅Swiss AEX,其實係賠了夫人又折兵。TGEC就係賭緊,而家對方會唔會願意「賤賣」個摩天輪。不過,朋友都話瑞士人做生意好鬼有原則,有時真係會蝕錢都唔理,總之你達唔到要求就No Way!所以「攬炒」機會都好大!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

你可能感興趣

  • 生活副刊
  • DIVA
  • 健康好人生