近日有民主牆風波、遲吓就有《施政報告》，跟手又話補選喇，咁多野做，Jenny當然都要加緊努力周圍收風。話說某日行經中環文華東方諗住買件Cake醫下肚嗰陣，竟然畀小妹撞見「賭王」何鴻燊御用律師高國峻(Gordon Oldham)。咁耐冇見，當然要打個招呼啦！Gordon即刻同Jenny講佢近排又有新搞作，聽到小妹「嘩！嘩！」聲。

呢個就係「The Pavilions Niseko，Ginto」起好之後個樣，靚到呢！！

唔止係律師 買地起樓So Easy

　　話說當年賭王爭產案，Jenny都有份跟進，所以對Gordon都唔陌生，不過大家可能對佢印象只係留喺律師呢個身份，其實佢身為一眾達官貴人嘅御用大狀，斷估搵埋搵埋都唔少，佢過去30年間，除咗以法律顧問身份參與本地同埋國際嘅商業事務之外，本身都係一名商人，百足咁多爪㗎，出版界、飲食業、地產界都有佢份，喺外國買地、起樓、起Hotel Resort對佢來講簡直係興趣！

　　我哋兩個見有啲時間，一於坐低慢慢傾。Gordon個「新搞作」就係去日本北海道買地起Hotel Resort加住宅別墅，項目名都定埋叫「The Pavilions Niseko，Ginto」嘩！不得了！原來係喺新雪谷（Niseko，舊稱「二世古」）區，係著名渡假勝地，尤其嗰度雪質仲係粉雪(Powder Snow)係世界上數一數二嘅靚雪！

「一見鍾情」北海道新雪谷靚地

　　Gordon同Jenny講，當日決定買呢撻地可以用「一見鍾情」形容，話說有日佢朋友同佢講有荀野益佢，Gordon一睇，係新雪谷噃！再睇下片，睇下地圖，加埋當地個「月兔」傳說鬼咁浪漫，就拍板買入喇，實地考察都係畀咗錢先去咋！如果呢啲唔係豪氣，Jenny都諗唔到其他形容詞喇！

　　當然呢個咁高級嘅項目Target一定唔係Jenny呢啲凡夫俗子，而係一班超高收入人士，幾豪幾靚自然不在話下，錢對佢哋來講濕濕碎，所以Gordon就話：「Service is the last money!」即係服務係最重要，佢哋實出盡力去做！

　　Jenny最鍾意去日本旅行，聽到嘩！嘩！聲，Gordon知道就順便講埋旅行經同Sell吓佢個「新搞作」，大讚北海道係佢近年旅行嘅「新寵」，四季景色各有特色，仲叫Jenny等佢個Resort過兩年落成之後去參觀一下。如果Gordon你請埋我去就更好喇！嘻嘻！

自言保守愛磚頭

　　其實Gordon喺世界各地都有買物業投資，因咩解究咁鍾意買樓買地呢？Jenny一直覺得中國人或者華人先鍾情磚頭啫，鬼佬都Like？Gordon即刻大笑，話自己其實係個好保守嘅人，投資地產都切合佢性格，尤其係一啲優質地段，只要有耐性，金融海嘯都唔駛驚，「咪擺吓囉！」梗係啦！Gordon你資金實力雄厚，完全唔使向銀行借錢！一個字－「型」！

　　講時講，當年「賭王」分身家嘅一連串風波，隨住四房人簽署一紙「聯合聲明」落幕，過咗咁耐，Gordon你而家望返轉頭有冇咩想講？Gordon就好官腔咁話，係一個好好嘅經驗，「總算皆大歡喜啦，至少我呢邊係！哈哈」仲話同「賭王」一家而家仲係好Friend，得閒會食飯飲茶吹水。下次帶埋Jenny去吖！

Gordon係「賭王」御用律師，而家同佢都仲係好Friend！