• |
  • 極速報價
  • |
  • 會員
  • 產品服務 / 串流版
  • 設定

22/09/2017

曉明回京臨別三句訴心聲 中聯辦交畀志民兄

  • 加入最愛專欄
  • 收藏文章
  • Jenny Yin

    Jenny Yin

    於傳媒行業打滾多年,其實亦是打雜多年,八卦天性難改,日常穿梭立法會及政總之間,閒時金鐘中環high tea、購物,順道收集情報。

    言歸政傳

  「我揮一揮衣袖,不帶走一片雲彩」呢句詩人徐志摩《再別康橋》內的經典一句,相信唔少人都聽過,今日就更加在電視聽住前中聯辦主任、剛升職做咗港澳辦主任嘅張曉明不斷Loop。

 

 

張曉明成為歷來最後生嘅做港澳辦揸Fit人!

曉明心情靚 上機前吟詩過你聽

 

  今日一早,張主任就準備坐上返北京嘅飛機,同香港講拜拜喇!今次張主任回京,應該有排都唔會返嚟香港住喇,但張主任心繫香港架!事關佢今次加官晉爵,接替退休嘅港澳辦主任王光亞,仲要係歷來最後生嘅做港澳辦揸Fit人!

 

  張主任有得升職返北京,今日臨上機心情似乎大好,不忘大Show文采,先係引用咗蘇東坡嘅《定風波》中「回首向來蕭瑟處,歸去,也無風雨也無晴」;跟住又徐志摩上身,整句好出名嘅《再別康橋》:「我揮一揮衣袖,不帶走一片雲彩」,似乎就唔係好捨得香港。不過,張主任唔只吟詩勁,流行曲都有返兩道散手,佢就以王菲首《傳奇》入面嘅歌詞,同香港人講:「我一直在你身邊,從未走遠」。果然,下午國務院就公布張主任接掌港澳辦呢個消息喇!

 

徐志摩詩集,Jenny都有一本。

 

王志民接掌港中聯辦

 

  張主任走了,香港中聯辦點呢?中央就調咗澳門嘅中聯辦主任王志民過嚟香港,接張主任個位。雖然都係中聯辦,不過Jenny就覺得王志民嚟香港應該難度高過喺澳門喇!一來地方大咗;二來香港近排咁多社會矛盾,王志民今次雖然係平調,但係工作難度就可能高咗好多喇!

 

  其實又唔使同王主任煩嘅!皆因王主任喺青年事務方面好擅長,連「唐唐」唐英年都話「肯定佢嘅工作」,中央同香港政府呢排又咁「睇重」香港嘅年輕人,王主任都可以話係被委以重任喇!

 

財政司政助大熱何翠萍已辭職料快埋位

 

  另外,除咗國務院公布完呢個人事調動之外,香港政府今日都終於出多三個新副局同政助名單,分別就係運輸及房屋局副局長蘇偉文、勞工及福利局局長政治助理馮興禮,而大家都識嘅吳璟儁真係榜上有名,做政制及內地事務局局長政治助理。

 

  Jenny仲以為政府今次會一次過出晒剩低嘅副局同政助添!事關上次講緊話財政司司長政治助理嘅大熱,喺商業電台做緊新聞及公共事務副總監嘅何翠萍,聽講已經辭去商台職務,睇嚟只係爭啲相關程序未完成,Jenny估計佢扣埋大假,應該好快就可以埋位!而一早就係食衛局政助大熱,人稱「蘇B」嘅《城市論壇》主持人蘇敬恆到而家都未有消息,唔通佢仲卡住咗喺品格審查呢關?睇嚟大家仲係要繼續等喇!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

你可能感興趣

  • 生活副刊
  • DIVA
  • 健康好人生