• |
  • 極速報價
  • |
  • 會員
  • 產品服務 / 串流版
  • 設定

04/10/2017

中秋去邊呃like好?林鄭話去大坑追火龍

  • 加入最愛專欄
  • 收藏文章
  • Jenny Yin

    Jenny Yin

    於傳媒行業打滾多年,其實亦是打雜多年,八卦天性難改,日常穿梭立法會及政總之間,閒時金鐘中環high tea、購物,順道收集情報。

    言歸政傳

  今日中秋佳節,再加上聽日係公眾假期,Jenny當然唔會齋留喺屋企賞月咁浪費啦,點都要出街Happy吓!咪話Jenny唔益大家,小妹今年中秋做咗唔少「功課」,而家就同大家開心Share吓啦!

 

舞火龍咁好睇,唔怪得林鄭都要嚟打個卡呃like!

 

中秋大坑舞火龍 林鄭都有興趣

 

  今年適逢回歸廿周年,而且國慶同中秋咁近,大坑坊眾福利會就喺星期二至五舉辦「慶祝香港回歸20周年大坑火龍賀中秋」,有成300個大坑居民組成隊伍,舞動67公呎、插滿長壽香嘅火龍穿梭大坑嘅大街小巷,而且今晚仲會喺維園出現添!Jenny都收到風特首林鄭都有興趣嚟湊熱鬧,唔知會唔會畀大家野生捕獲到呢?

 

除咗傳統綵燈會 仲有後生仔打卡位

 

  中秋又點少得花燈會呢!Jenny知道康文署今年就喺3個地方搞中秋綵燈會,分別係維園、沙田公園同埋青衣公園,大家可以揀返個近自己屋企嘅綵燈去散吓步、賞吓花燈!

  

  中秋節係傳統節日,但一啲都唔老土,而家啲年輕人仲好鍾意添!除咗因為有公眾假期之外,仲有好多熱門影相位可以打卡呃like!早幾日就有個巨型月亮藝術裝置嚟咗香港,Jenny身邊好多姐妹都去咗同佢selfie。呢個巨型月亮係首次喺亞洲展出,第一站就揀咗香港嘅灣仔以前囍帖街嗰頭!等大家今年中秋可以咁近距離「賞月」,真係好應節!

 

 

灣仔有巨型月亮夠吸引,但條龍就.....爭啲囉!

 

千祈咪煲蠟 兩張金牛隨時冇

 

  賞月、賞花燈、睇舞火龍,Jenny都知唔少讀者都蠢蠢欲動啦!Jenny仲幫大家搵埋中秋交通資訊,大家玩得盡興都要記得返屋企呀!

 

  大家都知每逢大時大節,港鐵都會有通宵車,住港鐵沿線嘅朋友就一啲都唔使擔心;而電車今晚都會延長服務時間去到凌晨3點;至於巴士方面,九巴就開咗兩條特別巴士線,分別係96R來往鑽石山站及黃石碼頭,同埋N601由金鐘開往寶達,另外仲有11條路線會加強服務或者延長服務時間,新巴都會增設特別路線,往來銅鑼灣至多區直到凌晨時分。

 

  不過玩還玩,Jenny同政府都一樣呼籲大家唔好煲蠟同埋放孔明燈呀!中秋佳節燒親自己或者人哋,仲要畀人罰多兩張金牛就唔好啦!(根據香港法例,煲蠟、拋擲物件到樹上或放孔明燈則最高可被判罰款2000元及監禁14天)仲有,大量中秋美食當前,要小心食滯啊!Jenny在此祝大家中秋節快樂,團圓但唔「臀圓」!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

你可能感興趣

  • 生活副刊
  • DIVA
  • 健康好人生