立法會下年3月就會補選4個被DQ立法會議員嘅議席，Jenny估唔同黨派都已經密密「練兵」；之不過除咗立會補選，其實仲有個前哨戰，就係中西區區議會「東華」同埋「山頂」兩個議席嘅補選，個結果係點，隨時畀到啟示各黨派去部署立法會補選。

中西區區議會旺升官

　　呢兩個議席原本係屬於民建聯蕭嘉怡同埋自由黨陳浩濂嘅，不過佢哋一個就做咗政務司司長政治助理，一個就做咗財經事務及庫務局副局長，升官之後呢兩個位就梗係「吉」咗出嚟。兩個位都咁「旺」，自不然惹來唔少人虎視眈眈啦！

　　區議會補選11月26日舉行，之前有傳言話連新民黨主席葉劉淑儀都話想出選山頂區，Jenny當堂嚇一跳，然後得啖笑。事關Jenny之後問返新民黨嗰邊嘅消息人士，佢哋嗰時都話葉太一直都只係考慮緊，唔知點解有傳媒一直話佢實去硬馬，果然葉太之後仲要特登出嚟話自己無意參選添！

　　中西區區議會山頂選區及東華選區補選提名期前兩日已經結束，Jenny今日就同大家睇睇兩個選區有咩候選人啦！先講下山頂選區候選人嘅名單，係由自由黨嘅楊哲安對「2047香港監察」嘅錢志健。

楊哲安眾星拱月 錢志健自比侵侵

　　楊哲安（Jeremy）身為前教育局政治助理，佢否認係因為未能加入今屆政府才轉戰區議會。話晒做過政助，大眾對佢應該唔會太陌生，不過熟悉的話又唔算，所以佢一早已經為中西區補選做好準備。早排Jenny已經見佢朝早喺麥當勞道同附近居民揮手，增加自己嘅辨識度。佢當日報名參選時有鍾國斌、張宇人、榮譽主席周梁淑怡同劉健儀自由黨眾星拱月咁款，加埋佢爹哋、前立法會議員兼現任政協楊孝華現身支持，可謂人強馬壯，幾威威呀！

你睇！簡直係曬冷的感覺！（楊哲安facebook圖片)

　　佢對手就係「佔中十子」之一嘅錢志健（Edward），本身識業係個資深對沖基金經理，同一班金融業界人士成立咗個「2047香港監察」。報名當日由民主黨立法會議員許智峯及南區區議員司馬文同支持者傍住，講氣勢就真係同Jeremy差一大截喇！不過佢都冇咩所謂，仲話對手只有一個建制政黨支持，佢就有成個民主派支持，仲自比特朗普，話「唔選過又點知呢？」……哎吔，Edward用侵侵來比喻自己，Jenny點諗都覺得唔係好對路噃！

　　話說回來，升咗官嘅蕭嘉怡同陳浩濂而家唔知習唔習慣呢？Jenny今日就係立法會撞到蕭嘉怡，見佢對眼袋同熊貓眼都好唔嘢小，令佢之前「小花」嘅形象大打折扣。唔知係唔係升咗官，隨之而嚟嘅工作量太大呢？Jenny作為女性，都係奉勸Kathy對自己好啲、休息多啲喇！

　　至於「東華」嘅情況又點呢？Jenny聽日再同大家講！