噚日Jenny講到中西區區議會補選山頂選區嘅形勢，由自由黨嘅楊哲安對「2047香港監察」嘅錢志健。咁今日Jenny就同大家睇吓另一選區「東華選區」又咩情況先！

　　東華選區有３個候選人，有民主黨嘅伍凱欣，同埋報稱獨立嘅呂錦強、劉舒燕。一眼望過去，得一個候選人係有政黨背景，睇個勢民主黨就似乎好易袋到個議席。如果你係咁諗，Jenny又要講返句「少年，你太年輕了」！

伍凱欣有「眾星拱月」

　　啱啱提到第一個候選人就係民主黨嘅伍凱欣，報稱職業係高級社區發展主任。作為唯一一個有政黨背景嘅候選人，佢去報名嗰陣就梗係得到眾星拱月嘅待遇啦！嚟撐場嘅有黨主席胡志偉，仲有黃碧雲、林卓廷同埋尹兆堅，連卿姐劉慧卿都有現身添！個陣勢同噚日講嘅自由黨楊哲安有得揮，齋睇已經贏晒！

「五星伴月」，有政黨支持係唔同啲！（伍凱欣Facebook ）

呂錦強「獨立」得嚟又同建制「老友鬼鬼」

　　相比起有「五星」伴住嘅伍凱欣，其餘兩位獨立候選人似乎好難比得上，不過睇嘢當然唔可以咁表面啦！第二位候選人呂錦強係新會商會學校校長，雖然佢強調自己係「獨立、冇政黨背景」，但係就被街坊發現佢報名參選嗰日，有唔少親建制嘅人出嚟撐佢場，而參選之前又被人見到佢同民建聯秘書長兼中西區支部主席陳學鋒好好傾。呢位呂校長「獨立」得嚟似乎都同建制派幾友好噃！另外有指佢喺學校入面派發由民建聯印製嘅《基本法》刊物，呂校長之後承認係有派過，不過就冇考慮過印製嘅政黨背景喎！

劉舒燕曾惹「鎅票疑雲」

　　另一個候選人劉舒燕，佢都係報稱「獨立」，但佢其實係前工黨成員，仲喺上屆區議會引起過「鎅票疑雲」添！話說當時佢去到最後關頭喺九龍城馬坑涌選區出選，搞到民協嘅黎廣偉差啲就輸畀工聯會嘅黃潤昌，而佢當時嘅選舉代理人仲係一個親建制組織嘅主席添！今次劉小姐又嚟到東華區同民主黨撼，唔知會唔會真係畀呂錦強漁人得利呢？

　　今次補選會喺11月26日舉行，大家都知投票站多數喺校舍設立，不過原來新會商會學校將被用作補選的投票站，而啱啱提過嘅疑似親建制候選人呂錦強就係呢間學校校長，候選人之一嘅伍凱欣就質疑會有潛在利益衝突，所以今日下晝就去咗中西區民政事務處請願，要求更改票站地點，民政事務處派咗代表出嚟接信，改唔改得成呢？Jenny都要同大家一齊等消息喇！