• |
  • 極速報價
  • |
  • 會員
  • 產品服務 / 串流版
  • 設定

24/11/2017

禮賓府Open Day 有新打卡勝地

  • 加入最愛專欄
  • 收藏文章
  • Jenny Yin

    Jenny Yin

    於傳媒行業打滾多年,其實亦是打雜多年,八卦天性難改,日常穿梭立法會及政總之間,閒時金鐘中環high tea、購物,順道收集情報。

    言歸政傳

  Weekend又到啦!唔知大家Plan定今個周末去邊未呢?Jenny今日又有好去處介紹畀大家喇,就係今個星期日,林鄭新裝修好嘅禮賓府有Open Day!

 

 

 林鄭喺Facebook教埋大家點影法可以影到禮賓府。

秋日賞花睇表演一樂也!

 

  Open Day嘅開放時間係上午10點至下午5點。政府話,大家可以喺Open Day參觀行政長官喺禮賓府舉行官式活動同埋接待賓客嘅地方,又可以去花園同小庭園睇吓花卉樹木,亦都會有導賞員同大家介紹禮賓府嘅歷史、建築特色,仲會安排香港警察樂隊及學生樂團在花園表演添!

 

  今次係林鄭做到特首之後,首次開放禮賓府畀公眾。之前佢仲為呢個「竇」豪使咗898萬,其中最特別嘅,莫過於將兩個網球場嘅其中一個改咗做休憩空間,種咗啲花花草草,淨係呢樣埋單都要成98萬㗎!

 

歷屆特首林鄭暫時最慳

 

  林鄭之前宴請立法會議員嘅時候,亦都同記者介紹過呢個休憩空間,話之後有開放日同埋頒授儀式嘅時候,市民同賓客就可以多個地方影相留念。Jenny仲記得呢個位可以影到禮賓府前門添!大家入到去記得賞面打返個卡喇!

 

  不過,大家唔好以為898萬呢個數字好似好大,但係其實林鄭已經係咁多個特首入面最慳家嘅一個!佢話,因為禮賓府係法定古蹟,所以今次使嘅錢大部分都係維護保養經費,自己同屋企人住嘅地方完全冇做過工程,內部改善、裝修以至改間格通通都冇!Jenny就記得,前特首CY喺任期內就用咗1485萬做例行維修、改間隔,仲喺花園開墾咗塊地種吓菜;而前前特首「煲呔曾」用咗1450萬做例行維修同裝修,相信大家最記得嘅應該就係佢個錦鯉池,不過個池只係用30萬就埋到單。三位特首拍埋嚟睇,林鄭暫時都仲係使得最少嗰個,不過佢先啱啱第一年做特首,之後嗰幾年仲會唔會再為禮賓裝下身就未知喇!

 

星期日仲有中西區議會補選

 

  提埋大家,今個星期日仲有中西區區議會嘅東華、山頂選區補選,填返之前去咗做政務司司長政助嘅蕭嘉怡,同埋財庫局副局嘅陳浩濂兩位嘅區議員空缺。Jenny已經幫住喺東華同埋山頂嘅朋友諗埋喇!一於就先去咗投票,跟手咪再去禮賓府打返個靚卡囉!你知啦!大家都好鐘意投票時間臨完之前先衝去投票,識投嘅就梗係早啲去,至少唔使排隊呀嘛!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

你可能感興趣

  • 生活副刊
  • DIVA
  • 健康好人生