今日喺電台入面嘅新界東補選論壇，真係名乎其實嘅「大混戰」！呢個唔畀嗰個講、嗰個唔畀呢個講……天氣好凍，但直播室就鬧哄哄！但聽住陳玉娥（娥姐）一人力戰其他對手，又疊聲又刺耳，Jenny耳仔猶如入咗恐懼鬥室！老細！小妹要報工傷呀！

　　不過，論壇都係要夠亂先夠娛樂性嘅！Jenny睇過，6位候選人當中，鄧家彪（阿Bill）、范國威（咖哩飯）、方國珊（哪吒）同埋黃成智呢4位可謂身經百戰㗎啦！之不過對住兩位所謂「新手」：一位搶晒咪嘅娥姐，另一位「一心向主」嘅趙佩玉，小妹隔住耳機都Feel到4位嘅無奈！點解咁講？各位看官睇埋落去就知喇……

對住娥姐同玉姐九唔搭八放笑彈，阿Bill同哪吒忍笑忍得好辛苦！（商台節目直播片段截圖）

I'VE GOT THE POWER！

　　女人真係唔得罪得。是咁的，論壇一開始仲係好地地，去到主持人同各位候選人傾偈嘅時候，兩位女士就嚟料喇！首先趙佩玉一嚟就「主耶穌」前、「主耶穌」後，仲話有姐妹同佢講見到天父畀咗個皇冠、權杖同埋斗篷佢，所以自己一定會當選，而且「當時有電流觸動我成身嘅感覺」添！

　　主持人都忍唔住窒佢：「咁應該係選特首喎！」只不過趙女士斬釘截鐵咁話：「唔係！係選立法會！」好囉……之但係點解係揀新界東呢？呢個時候坐喺一邊嘅娥姐就搭嗲：「我囉、我囉！因為我囉！」Jenny就諗極諗唔明點解又關娥姐事呢？呢邊趙女士就繼續話係「上帝的感召」、「要臣服上帝」云云，兩位真係完美演繹何謂「雞同鴨講」喇……

娥姐談「緋聞男友」：AY完唔完美唔關我事！

　　到同娥姐吹水嘅時間喇！前年娥姐就喺同一個地方大讚CY「太完美」，今日都唔例外，一講到現任特首林鄭、捲入僭建風波嘅律政司司長鄭若驊，娥姐第一個反應都係大讚「完美！」仲話司長同佢係「同類人」添！呃……娥姐呢句算唔算係讚美就真係見仁見智喇……

　　然而娥姐愈說愈激動，這爆咪感覺怎形容？就係主持人都頂唔順，唯有叫坐隔離嘅黃成智幫手拉開個咪，相信唔少聽眾聽到嗰下都同小妹一樣「嘰」一聲笑咗出嚟！

　　娥姐今次仲罕有談及「緋聞男友」公民黨黨魁楊岳橋㗎！話同AY 係「美麗的誤會」，仲話「佢完唔完美唔關我事」，唔知係唔係主持人都聽咗咁耐笑料，大嘆咗句「呢句最中肯」呀！

　　淨係上半場Jenny已經笑到牙骹軟！Blue Monday有咁嘅娛樂，真係Thanks God喇！

邊個？邊個？邊個「講三級嘢」？

　　去到候選人「互片」嘅時間，咖哩飯作為唯一一個最明顯嘅民主派，梗係受到各方圍插啦！正當Jenny以為娥姐都要力插咖哩飯，勢估唔到佢去鬧趙佩玉噃！鬧佢「講三級嘢」、「整污糟天主」、「係咁逼人聽佢講」，仲唔畀佢回應添！點解小妹橫睇掂睇，都係覺得娥姐講梗佢自己？只不過一開頭明明娥姐都冇乜同趙女士有衝突，何解突然咁火呢？

　　等小妹即刻去Facebook睇前傳先！發現原來喺娥姐開火噴趙女士前，佢哋喺咪後已經有啲火喇……正確啲嚟講係娥姐突然開趙女士拖，嚇到咖哩飯都喺Facebook度出Po話「突發」、「娥姐開火：你講三級嘢」，仲話「我喺一邊唔敢亂插咀……」，再加多個「表示驚驚」添！搞完一輪，原來娥姐唔Like趙女士講同性戀議題，兩位阿姐牙齒印早在港台個選舉論壇已經出現。

毋忘共同目標：齊插咖哩飯

　　最後主持人問各位候選人邊個喺論壇表現最差，除咗黃成智話唔評論任何人之外，個個都話係咖哩飯，只不過講原因係咩呢？大家就拉咗去講唔同意佢個立場嗰到，難怪Jenny見到有網民留言話「1-5號全部一家親」喇！不過咖哩飯都唔執輸，話返最大對手阿Bill先係最差。Jenny聽到呢到，就好似睇到一個小型議會咁，大家對一件事、一個人嘅睇法，從來都係立場行先，實際為後，難怪前大主席曾鈺成都話過大家「寧為喪屍，勿站錯邊」喇！