九龍西補選結果出爐喇！泛民喺李卓人同埋馮檢基鷸蚌相爭之下，建制派嘅陳凱欣（阿欣）可謂贏得毫無懸念。無他嘅，正如阿欣自己都話齋：佢係最後生嘅一個（候選人），後生女出得嚟選，我Jenny睇落點都覺得養眼過兩位Uncle喇！

阿欣公布行程親疏有別 行家嬲嬲豬

　　正所謂：「劇本一早已經寫好」，陳凱欣似乎都篤定自己有得「凍蒜」，對傳媒都唔係好上心。據Jenny多年採訪經驗，按慣例喺選舉前一兩日，各大候選人都會先公布選舉日嘅拉票安排，以便傳媒安排人手採訪。可惜自稱「自己擁有傳媒DNA」嘅阿欣，本應最了解傳媒人的苦處，但偏偏今次就唔係咁體恤行家們喇！

　　據Jenny所了解，阿欣前一晚喺傳媒WhatsApp Group入面只係公布一場選舉活動，大家正奇怪嘅時候。有相熟行家就同Jenny報料，同阿欣相熟嘅傳媒私下收到一共5個選舉行程，仲寫明「上述站點僅提供予主要傳媒，敬請不要外傳」添！有「傳媒DNA」嘅阿欣，應該好了解上面嗰句備註，喺面對傳媒嗰陣絕對唔可以犯嘅大忌！尤其係阿欣你自己都做過傳媒，冇可能唔明吖！Jenny覺得呢句說話如果係由其他候選人傳出嚟唔會驚訝，但係由阿欣度傳出，就真係O晒嘴！

「聾耳陳」潛水廿個鐘 上水無耐就當選

　　行程就流傳咗出嚟，記者當然要查證真偽，唔少行家都一直喺傳媒發布Group度追問阿欣真實行程為何。不過阿欣同佢團隊唔知係唔係借咗「聾耳陳」隻耳，十問十唔應，成個傳媒發布Group變成「傳媒單機Group」，有行家就話睇唔過眼，話「以前阿欣教落，對唔肯回應嘅、唔講人話既人，要追問到底」，估唔到今日輪到阿欣嘅團隊「對所有野都不聞、不問、不應、不答」。WhatsApp Group群情洶湧，結果阿欣團隊就喺潛水20個鐘之後，終於上返水，同埋Confirm返流傳行程中嘅其中一項，不過當時已經有3項已經做完嚕～

　　之前劉青雲嘅一句「做人冇公關，食X㗎喇！」，道出呢個年代識拜「關公」係幾咁重要。而阿欣今次就教識大家，冇公關唔駛食X嘅，夠後生就咩都No Problem啦！