• |
  • 極速報價
  • |
  • 會員
  • 產品服務 / 串流版
  • 設定

06/12/2018

天文台、公民教育委員會齊出月曆 靚相VS「癲噹」揀邊樣?

  • 加入最愛專欄
  • 收藏文章
  • Jenny Yin

    Jenny Yin

    於傳媒行業打滾多年,其實亦是打雜多年,八卦天性難改,日常穿梭立法會及政總之間,閒時金鐘中環high tea、購物,順道收集情報。

    言歸政傳

  2018年剩返唔夠一個月,大家準備定下年嘅月曆未呢?Jenny貴人事忙,冇返個月曆擺喺枱頭真係唔得掂!不過,月曆雖然唔係拎出街,但都唔可以是是旦旦嘅!Jenny今日就同大家開心Share下政府將會推出嘅月曆,有得揀免費同收費,你揀邊樣?

 

 

「癲噹」夠Cute仲免費派

 

  第一個就係由民政事務局同埋公民教育委員會製作嘅年曆,今年佢哋再度邀請本地動漫創作人陳宇峰(John Chan)為年曆設計插圖,透過繪畫卡通「癲噹」同親友們相處嘅逸事,表達今年年曆嘅3個主題:「尊重與包容」、「負責」同「關愛」。

 

  阿John仲話,啲插畫貫徹「癲噹」故事嘅幽默,以溫馨手法帶出核心公民價值。例如2月嗰一版係以農曆新年作背景,提醒大家可藉着拜年關心長輩,凸顯關愛嘅重要性;3月就描繪「癲噹」與朋友相處,帶出每個人都會有唔同意見,透過尊重與包容,就可以做到和而不同;而12月就加入埋環保信息,鼓勵大家聖誕交換禮物時用返環保包裝或轉贈舊禮物,展現「負責」呢一個公民價值。

 

  重點係!呢個年曆係免費派發㗎!Jenny就收到風,派發地點包括18區民政諮詢中心、公共圖書館、各區大會堂、香港文化中心、香港歷史博物館,同埋喺柴灣嘅青年廣場7樓公民教育資源中心,先到先得!不過冇時間去拎都唔緊要,個月曆係設有網上版,大家可以喺聽日(7日)開始喺公民教育委員會網頁(www.cpce.gov.hk/calendar2019)到下載就得喇!

 

天文台月曆相高質 附送有用氣候天文資料

 

  第二個就係天文台推出嘅月曆,用咗之前舉辦嘅「風雲際會」天氣景象「海、陸、空」全接觸相片及影片徵集活動,同埋第二屆「銀齡的天空」天氣拍攝比賽嘅部分獲獎作品,而封面就係由香港攝影愛好者拍攝、獲世界氣象組織收錄喺佢哋2019年月曆入面嘅「陽光橋」。每張月曆相都設有QR Code,方便讀者查看有關資訊。月曆同時都刊載咗有用嘅氣候同天文資料,包括每月氣候資料同埋特別氣候事件、日出日落時間、月出月落時間、日食月食出現日期,仲有潮汐漲退等等。

 

  呢個月曆就唔係免費喇,承惠50個大洋,聽日開始喺香港天文台資源中心、政府新聞處刊物銷售小組同埋地政總署九龍地圖銷售處有售。不過Jenny都覺得啲相真係好高質,畀返啲版權費都好應該吖!係咪咁講先!

 

 

「港元定存息率」大比拼 食息都要食得醒 https://goo.gl/i9KA4Y
我要回應

你可能感興趣

winnielifestyleinternationalaffairs

  • 生活副刊
  • DIVA
  • 健康好人生