• |
  • 極速報價
  • |
  • 會員
  • 產品服務 / 串流版
  • 設定

19/12/2018

港鐵就四線齊冧交報告 推說「唔知」就可算數?

  • 加入最愛專欄
  • 收藏文章
  • Jenny Yin

    Jenny Yin

    於傳媒行業打滾多年,其實亦是打雜多年,八卦天性難改,日常穿梭立法會及政總之間,閒時金鐘中環high tea、購物,順道收集情報。

    言歸政傳

港鐵故障鑊鑊甘,相信大家就算幾咁習以為常,都好難忘記10月發生嘅四線齊冧大故障,港鐵今日終於交咗報告畀政府喇!同一日佢哋都搞咗個Briefing,同傳媒交代一下個報告講咩喎!但有時講來講去,其實根本管治問題就冇解決過囉 !

 

 

 

只開簡介會 原來高層on cam 會緊張

 

  Jenny都明白,整份報告應該有唔少專有名詞,行外人好難一睇就明,所以就要有個簡介會講解下,不過點解唔直接做返個直播記招呢?高層們就話其實份報告已經擺咗上網,講得好詳細㗎啦,只係擔心大家唔明先至開多個簡介會同大家解釋。不過,PR哥哥就同Jenny講,其實係怕各位高層對住部cam嘅時候會緊張、解釋得唔夠清楚喎!所以就決定開返個不供拍攝嘅簡介會啦!

 

要由外人話你其實唔知 真係匪夷所思

 

  話晒四線齊冧咁多年來都冇發生過,到底因乜事搞到咁呢?報告就話,係因為呢四條線有兩個系統供應商,佢哋嘅計算器去到某一個數值就需要重置,但係一個係要手動、另一個係自動嘅。兩個系統分開運作就好地地,乜事都冇,但係一合埋佢哋嘅數據就要做同步,點知自動嗰個未去到最高值,就已經自動重置咗,搞到手動嗰邊啲數亂咗,繼而停機!

 

  港鐵就話,唔知道原來個系統會咁,所以冇預計過兩個系統聯繫咗會發生咁嘅事,仲要係之後由外間專家話返比佢哋聽先至知道㗎咋!Jenny同其他行家一聽,深感真係匪夷所思,淨係想送港鐵一句:乜你唔睇說明書咩?陰謀論一啲諗 :定係又有人欺上暪下?

 

沙中線紅磡站驗鋼筋 三條全fail

 

  「四線齊冧」唔冧都冧咗,Jenny就希望沙中線紅磡站醒醒定定、生生性性喇!事關Jenny聽聞立法會鐵路事宜小組委員會成員田北辰(田二少)話收到風,沙中線紅磡站嘅鋼筋問題直到今日驗咗三條鋼筋,結果三條全fail!命中率可謂100%,唔知呢樣嘢,高層們又知唔知?幾時知?定係又係要由其他人話返畀佢哋知呢?

 

  港鐵(同埋港鐵乘客)喺今年都幾「多災多難」,嗱!距離2019年仲有兩個星期左右,希望港鐵乘客今年嘅厄運到此為止喇!如果唔係一個唔覺意,又整個聖誕大故障,大家到時焗住要喺港鐵站入面倒數,就真係永世難忘喇!

「港元定存息率」大比拼 食息都要食得醒 https://goo.gl/i9KA4Y
我要回應

你可能感興趣

  • 生活副刊
  • DIVA
  • 健康好人生