• |
  • 極速報價
  • |
  • 會員
  • 產品服務 / 串流版
  • 設定

20/12/2018

煲呔終極上訴獲批 今鋪洗白有機?

  • 加入最愛專欄
  • 收藏文章
  • Jenny Yin

    Jenny Yin

    於傳媒行業打滾多年,其實亦是打雜多年,八卦天性難改,日常穿梭立法會及政總之間,閒時金鐘中環high tea、購物,順道收集情報。

    言歸政傳

  前特首曾蔭權「煲呔曾」涉貪一案,上年就已經定咗要坐20個月,不過佢唔服,決定就定罪同埋刑期上訴,結果今年年中就被駁回定罪上訴,但就獲得減刑,由監禁20個月,減至12個月,訟費都少埋,由500萬減100萬元。而今日終院都終於批咗佢個上訴許可,單Case出年5月開庭打喇!

 

 

煲呔曾今日朝早去終院等上訴許可,大班記者當然在法院外守候,要拍得煲呔曾唔容易呀!

 

坐監一日都嫌多 點解唔申請保釋 

 

  減刑係一回事,畀人定咗罪煲呔曾都似乎條氣點都唔順,一於上訴去到終審法院,今日終院都終於批咗佢個上訴許可,單Case出年5月開庭打喇!但係煲呔曾就事先講明,無論今日終院批唔批個許可,佢都唔打算申請保釋噃!

 

  假如煲呔曾終極上訴得直,其實佢就唔需要坐監,Jenny一開始都唔係好明點解佢唔申請保釋。話晒坐監喎!梗係一日都嫌多啦!不過,計返條數,煲呔曾上訴嗰陣,已經坐咗63日,刑期減到12個月,即係話佢仲有10個月左右嘅時間坐。如果佢行為良好,仲有得「扣假」,坐少三分一添!即係話最快可以下年1月就出嚟做返條好漢喇!Jenny估或者就因為咁,煲呔曾索性坐埋佢,話晒無牢獄債就一身輕,費事審完一大輪又入返去!

 

坐監都有假放?諗多咗喇!

 

  要「扣假」扣到1月就出得嚟,首先你要「行為良好」喇!之但係點解明明係坐監,都會有得「放假」嘅呢?其實此「假」不同我哋平時講嘅嗰啲「假」,呢個「假」其實係講緊假釋,即係你行為良好,就可以扣三分一刑期,但係出獄後再犯法,就要入返去坐埋本身扣咗嘅刑期。呢種扣刑期就被俗稱為「扣假」喇!所以Jenny提提大家,唔好以為坐監都有得放假咁Happy,大家只係被個名誤導咗咋!

 

「港元定存息率」大比拼 食息都要食得醒 https://goo.gl/i9KA4Y
我要回應

你可能感興趣

  • 生活副刊
  • DIVA
  • 健康好人生