• |
  • 極速報價
  • |
  • 會員
  • 產品服務 / 串流版
  • 設定

04/02/2019

「熱廚房」核心豬年運程 張建宗可爭升職? 鄭若驊桃花旺盛?

  • 加入最愛專欄
  • 收藏文章
  • Jenny Yin

    Jenny Yin

    於傳媒行業打滾多年,其實亦是打雜多年,八卦天性難改,日常穿梭立法會及政總之間,閒時金鐘中環high tea、購物,順道收集情報。

    言歸政傳

  送狗迎豬,每逢新正頭當然要睇下運程啦!究竟「熱廚房」核心嘅特首同三位司長豬年運程係點?Jenny就一於善用民間智慧,同大家一齊睇睇先!話唔定畀到啟示各位讀者呢!

 

 

 

林鄭財運、事業、健康運都有進步

 

  事先聲明,Jenny並非玄學及星座專家,以下運程預測係參考坊間書籍綜合寫成,同港鐵嘅施工記錄一樣,信則有不信則無!

 

  首先,梗係要睇睇我哋一區之首--特首林鄭月娥啦!林鄭肖雞,整體而言豬年可以擺脫了犯太歲的衝擊,財運、事業同健康運都有進步,當中事業需要加倍親力親為。咁又可以放心喎!林鄭出名勤力,親力親為無難度,只係怕其他官員唔生性令佢忽然增加工作量啫!

 

  不過,因為非桃花或相合年,人緣運就一般喇,做好本份唔主動惹是招非,都冇咩事!值得留意係豬年係屬雞者嘅,「思想學習投資年」,投資或學習都會有額外花費,用錢就最好謹慎啲喇!

 

屬兔張宗是非星最多

 

  至於屬兔嘅政務司司長張建宗就運勢比雞年及狗年順遂唔少,新一年可以專注事業,加埋吉星飛臨,好似張宗咁喺政府身居要職,最能獲得助力,可以爭取升級機會。咦!政務司再升咪……

 

  健康方面,要留意工作壓力大而精神緊張搞得訓唔到,需平衡工作及休息時間。講到人緣,屬兔豬年就爭少少喇,雖說有貴人運,但是非星卻係十二生肖中最多。張宗要小心有人喺你背後放箭呀!

 

鄭若驊桃花旺盛唔再畀人鬧

 

  律政司司長鄭若驊屬狗,狗年犯太歲,捲入僭建風波不特止,又被指未有外聘獨立法律意見「放生」前特首梁振英,真係畀人鬧到隻狗咁!嚟到豬年有冇改善呢?答案係……有嘅!

 

  由於係「天喜」桃花年,桃花旺盛,尤其係人際關係好咗,無論同上司、同輩及下屬都可以融洽相處,如果工作需經常同人接觸,豬年就得心應手喇!不過就要注意春季唔好去太多應酬,同埋最好預備多少少應急錢,以防不時之需。唔知鄭司長新一年有冇辦法同傳媒關係破冰呢?

 

波叔黐實張宗有運行

 

  去到近日全世界都等緊佢封「小小心意」$4000利是嘅財政司司長陳茂波(波叔)喇!肖羊嘅波叔唔止與太歲關係友好,原來嚟到豬年同張宗最好就係形影不離!皆因肖兔朋友係肖羊者嘅貴人呀!

 

  話晒波叔掌握港府財政大權,Jenny當然非常關心佢財運啦!運程就話,羊仔羊女凡事需親力親為,最好就唔好再因循守舊,宜借「華蓋」吉星之力諗吓新思維,咁就可以突圍而出;財運就以正財為主,不宜作大手或高風險投資。Jenny希望波叔月尾公布嘅預算案真係有新嘢啦!

 

  最後,Jenny在此祝各位讀者家肥屋潤、豬籠入水,最重要係身體健康!恭喜!恭喜!

 

「港元定存息率」大比拼 食息都要食得醒 https://goo.gl/i9KA4Y
我要回應

你可能感興趣

  • 生活副刊
  • DIVA
  • 健康好人生