• |
  • 極速報價
  • |
  • 會員
  • 產品服務 / 串流版
  • 設定

26/03/2019

PC三合一 唔怕畀人話模糊焦點?

  • 加入最愛專欄
  • 收藏文章
  • Jenny Yin

    Jenny Yin

    於傳媒行業打滾多年,其實亦是打雜多年,八卦天性難改,日常穿梭立法會及政總之間,閒時金鐘中環high tea、購物,順道收集情報。

    言歸政傳

  咖啡奶茶三合一就聽得多,記者會(PC)三合一你又聽過未?今日Jenny就真係見識到啦!話說今日林鄭突然話要開PC,咁以往開PC都多數集中一個議題,點知今日係一炮三響!仲要係3個都係爭議到嘭嘭聲嘅議題,個個都足以做A1,包括修訂《逃犯條例》、「三隧分流」同埋沙中線工程中期報告發布。

 

 

 

A1議題「三合一」

 

  比著平時,呢3個Topic閒閒地都要開成一個半鐘,政府今日咁安排,難免會惹來模糊焦點之嫌,始終公眾對呢3個議題都好關心,而且涉及嘅術語又艱深,行家們一定好多嘢要追問。但係今次咁樣「三合一」,Jenny心諗特首同埋兩位局長真係會坐足4個半鐘畀記者問問題?

 

  林鄭都知行家們唔多Like呢個安排,皆因記協出咗聲明批評安排,所以林鄭PC一開始就解釋點解咁樣做。佢話,係因為3個議題都係喺今朝行會審議兼通過,覺得咁樣安排可以畀公眾第一時間知道事件發展,如果分3個PC,可能要「排到聽日」先得,所以就唔拆散做咁多個記者會。佢仲大派定心丸,話唔需要擔心佢係想擺埋一齊,想早啲走、答少幾條問題。

 

棘手嘢要一件不留

 

  林鄭又話,點解今日係佢親自主持,係因為3個議題睇落唔多拉更,但或多或少都關政府管治同埋威信,甚至涉及中央,所以由她本人解答就更有權威啦!Jenny聽聞林鄭聽日又飛喇,以佢咁愛親力親為嘅性格,梗係要飛之前全部KO晒佢啦!要排到聽日?No Way!

 

  不過,Jenny同行家都擔心咁樣會唔會成為咗先例,林鄭就話今次情况係罕有,如果行家們傾向逐個議程處理,政府都會「從善如流」、「咁我哋以後咪用呢啲方法囉,不過我以為(今次)都係方便(大家)」,如果大家對政府嘅安排迷惘,「最易就係打個電話」去佢Office、去新聞處,咪冇誤會囉!仲話今日已經預夠咗時間畀行家提問㗎啦!結果成個PC連兩個半鐘都冇就完了,平均一個Topic都分唔到一個鐘,真係唔係想「答少幾條問題」?大家信唔信?

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

你可能感興趣

  • 生活副刊
  • DIVA
  • 健康好人生