• |
  • 極速報價
  • |
  • 會員
  • 產品服務 / 串流版
  • 設定

15/04/2019

泛民先「甩轆」 修訂《逃犯條例》全速前進 自由黨或成攔路虎

  • 加入最愛專欄
  • 收藏文章
  • Jenny Yin

    Jenny Yin

    於傳媒行業打滾多年,其實亦是打雜多年,八卦天性難改,日常穿梭立法會及政總之間,閒時金鐘中環high tea、購物,順道收集情報。

    言歸政傳

  上個星期五立法會內會就通過成立修訂《逃犯條例》嘅法案委員會,罕有咁只係畀議員3天時間報名加入,跟住首次會議最快喺今個星期三(17號)開波。效率之高真係令Jenny 忍唔住「嘩」咗聲!有建制派幫忙護航,政府想立法會休會前通過嘅如意算盤係咪就打得響?Jenny估就未必喇!

 

 

料非建制派點都會總動員「入會」

 

  法案委員會報名今晚午夜就正式截止,截至今日上午11點幾,據Jenny統計,有60名議員表示加入委員會,建制派就快手呀,36人已經「入會」,非建制派就暫時得24人。不過,大家都唔駛擔心冇戲睇,皆因泛民講明「全力阻止惡法通過」,所以可以預見,非建制派點都會總動員「入會」。

 

  之不過,得3日時間去報名,中間仲夾咗個星期六、日,一班泛民梗係嬲嬲豬啦!資訊科技界莫乃光(Charles)就喺Fb出Po,話今日喺立法會,9個鐘內有7個兩小時或以上嘅會要開,其中兩段時間仲會有三個會同時進行。批評「政府很『心急』,要通過國歌法、逃犯條例,全部預早話明開幾多個鐘就要過,一切只是做個樣,數夠票,為所欲為。」至於民主派會議召集人毛孟靜(Miss Mo)仲話,要向秘書處投訴添呀!

 

Miss Mo要投訴 琼子話唔公道

 

  內務委員會主席李慧琼(琼子)就同Jenny講,覺得Miss Mo嘅投訴唔公道,皆因根據守則,係由提出成立法案委員會的最資深議員,負責召開法案委員會,咁即席報名嘅議員中,最資深就係經民聯嘅石禮謙,所以由佢決定報名期限,係合符程序咁話!係囉!鬼叫你地班泛民「甩轆」,人地舉手報名嗰陣,本來更加資深嘅涂謹申同梁耀忠都唔見影咩!冇得怨!

 

  Jenny就估,可能石議員都Feel到政府好心急,所以想咋咋臨完成報名、快快趣開會。點解Jenny咁講?因為小妹早就收到消息,政府預100個鐘去審議,希望趕及7月休會前通過修例。如果要成事,計計條數,一星期開3日會走唔甩,加埋《國歌法》又審議緊,仲有唔好唔記得仲有《財政預算案》上大會審議啊!一眾議員就OT硬,星期六實要開會啦!

 

自由黨手執「自由球」

 

  值得一提係,今次修訂《逃犯條例》並非一面倒只有泛民反對,由於部分商界人士仍然唔太收貨,所以建制派「壞孩子」、商界背景嘅自由黨似乎都會出下手「拉布」,成為最大變數。自由黨黨魁鍾國斌之前仲好大膽咁話有勇氣說:「不!」、「仲未話應承一定接受碟臭海鮮」。雖則自由黨喺立法會只得4票,計埋非建制票都唔過半數,唔會阻止修訂通過,但就足夠令政府個時間表大亂。

 

  照咁睇,政府真係要諗諗計喇!至於阿爺一旦召喚,自由黨會喺最後一刻歸位吖,定係堅持要繼續曳曳?Let’s wait and see!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

你可能感興趣

  • 生活副刊
  • DIVA
  • 健康好人生