• |
  • 極速報價
  • |
  • 會員
  • 產品服務 / 串流版
  • 設定

10/05/2019

容海恩教女「有一手」:最重要唔好識黃色就得啦!

  • 加入最愛專欄
  • 收藏文章
  • Jenny Yin

    Jenny Yin

    於傳媒行業打滾多年,其實亦是打雜多年,八卦天性難改,日常穿梭立法會及政總之間,閒時金鐘中環high tea、購物,順道收集情報。

    言歸政傳

  今個星期日就係媽媽節,大家諗定有咩節目孝敬媽媽未呢?而新民黨今日就搞咗個母親節茶聚,佢哋嘅副主席容海恩(Eunice)同該黨南區區議員陳家珮(Judy)仲齊齊帶佢哋嘅B囡見下大家!唔覺唔覺,Eunice個B女昌蔚已經3個月大喇!而Judy嘅細女Hannah就大昌蔚一個月,而家4個月大。

 

兩位B女細細就要學面對傳媒喇! 

 

咩色都要識 黃色唔好識?

 

  話就話係母親節茶聚,不過就係兩個媽咪互送禮物畀對方嘅B女啫!Eunice話見Hannah成日咬手指,所以就送條手巾仔畀佢代替,好過咬手指喎!佢仲自爆自己都咬毛巾咬到6歲添!而Judy就送咗一部彩色嘅玩具音樂琴畀昌蔚,Eunice仲捉住昌蔚隻手試玩咗幾下,仲話「你唔好識黃色就得喇,其他都要識嘅!」嘩, Eunice嘅教女方法果然「有一手」,細細個就要政治正確喇!

 

 

Eunice今次唔擺阿B上台?

 

  立法會修訂《逃犯條例》個委員會而家鬧雙胞,聽日(11日)上晝建制同泛民都分別召開會議,Jenny預計到時場面又唔知會混亂成點……不過Jenny就諗返起上兩個星期法案委員會開第二次會嗰時,喺暫停會議嘅時候,Eunice就抱咗昌蔚落嚟會議室噃!

 

  B女一到,兩大派就即刻暫停干戈,尤其係班女議員仲圍住昌蔚團團轉,連泛民嘅毛孟靜(Miss Mo)都大讚昌蔚「眉目如畫」!今個星期六又有一場大戰,最後係由民主派定建制派坐主席位都未知,Eunice會唔會又出動B女嚟做「親善大使」?Eunice都笑住話不如由昌蔚坐上主席台霸位,但而家會議室已經係「唔安全嘅工作地點」,所以都係唔帶昌蔚去喇!計Jenny話,直情唔使派昌蔚霸位,直接由昌蔚做主席咪得囉!到時咁多位議員淨係掛住討好「主席」,氣氛一定好融洽!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

  • 生活副刊
  • DIVA
  • 健康好人生